7. Guglielmo, conte di Poitiers. *
Secondo il testo ricostituito dal Bartsch (Chrestomathie provençale, Elberfeld, 1880, p. 32).
Pos de chantar m'es pres talens,
farai un vers don sui dolens;
no serai mais obediens
en Peitau ni en Lemozi.
Qu'era m'en irai en eissill,
en guerra laissarai mo fill,
en gran paor et en perill,
e faran li mal sei vezi.
Lo departirs m'es aitan greus
del seignoratge de Peiteus:
en garda lais Folco d'Angeus
tota la terr' e son cozi.
Si Folcos d'Angeus nol socor
el reis de cui eu tenc m'onor,
faran li mal tuit li pluzor
Si ben non es savis e pros,
quant eu serai partiz de vos,
viaz l'auran tornat en jos,
car lo veiran jove mesqui.
Merce clam a mon compaigno,
s'anc li fi tort, que lom perdo,
et el prec ne Jezu del tro
en romans et en son lati.
De proeza e de joi fui,
mas ara partem ambedui,
et eu irai m'en a celui
on tuit peccador troban fi.
Mout ai estat coindes e gais,
mas nostre seigner nol vol mais;
ar non posc plus soffrir lo fais,
tan sui apropchaz de la fi.
Tot ai guerpit quant amar soill,
cavalaria et orgoill,
e pos Deu plaz, tot o acoill
e prec li quem reteng' ab si.
Toz mos amics prec a la mort
queil vengan tuit e m'onren fort, (que il)
qu'eu ai avut joi e deport
loing e pres et en mon aizi.
Aissi guerpisc joi e deport
* Biografia, secondo il testo dello Chabaneau (Les biographies des troubadours, Toulouse, Privat, 1885, p. 6): Lo Coms de Peitieus si fo uns dels majors cortes del mon, e dels majors trichadors de dompnas, e bons cavalliers d'armas e larcs de dompnejar. e saup ben trobar e cantar, & anet lonc temps per lo mon per enganar las domnas. et ac un fill que ac per moiller la duquessa de Normandia, don ac una filla que fo moiller del rei Enric d'Englaterra, maire del rei jove, e d'en Richart, e del comte Jaufre de Bretaingna.
