33. Bertrando d'Avignone e Raimondo de las Salas. Bertran, si fossetz tant gignos

33. Bertrando d'Avignone e Raimondo de las Salas (?).

Dal canzoniere A.

Bertran, si fossetz tant gignos

que saubessetz lo mieils triar

d'aisso qez eus vuoill demandar,

tenssons fora ben de nos dos,

digatz: cal ant plus pretz cabal

li Lombart o li Provensal?

cals razonatz ni tenetz per plus pros

per mieils far gerra conduich ni dos?

Raimon, d'estas doas razos 

qem partetz, las cals mieiller par, 

l'una pren, l'autra lais estar.

Lombartz vuoill esser ad estros, 

car de Proenssa no me cal. 

per q'ieu chausisc sai que mais val 

Lombardia, on trob cavaliers bos 

francs e cortes, em platz lor messios. 

Bertran, al mieu entendemen 

chausit avetz lo sordejor. 

trop son plus ric gerrejador 

li Proenssal e plus valen

per gerra e per mession; 

tolon la terra a 'n Symon

eil demandon la mort a lor seignor

et al comte cuich que rendra s'onor. 

Raimon, trop lor datz d'onramen,

q'a Belcaire en lor onor

lor fetz Symons tant de paor,

e si eron dos tans de gen,

en apres a gran mespreison

renderon li sa garnison.

per q'en totz faitz sont li Lombart meillor

e plus honrat e mieils combatedor.

Bertran, a doble vos envit

de la tenzon que razonatz; 

que sai es proeza e barnatz

mantengutz, larguesa e convitz; 

lai dona hom cavals e destriers 

e fant rics conduitz e pleniers; 

en Lombardia podetz ben, sius platz, 

morir de fam, si deniers non portatz. 

Raimon, fort avetz joc marrit, 

qe qand es perdutz l'envidatz. 

sai son plus donador assatz, 

eil Lombart son mais issernitz

qu'il dan cavals, draps e deniers, 

els tenc d'armas plus fazendiers 

qels Proensals que vos tant me lauzatz, 

e sai es hom plus soven convidatz.

Bertran, de tot avetz gran tort, 

qe lai a trobadors prezans 

qe sabon far e vers e chans, 

tenssos, sirventes e descortz, 

e lai son las dompnas de pretz,

qe l'una cuich q'en val ben detz

de Lombardas, mas qe sont femnas grans, 

c'apenas neis sabon far bels semblans. 

Raimon, aissi non a conort, 

q' ieu jaus en sia contrastans; 

car li Lombart d'aitals bobans

nois plazon ni d'aitals deportz; 

car vos mezeus, si vos voletz, 

atressi conoisser devetz

qe de dompnas nais grans engans 

c'alz maritz fant noirir autrui enfans.

XIV, Gui d' Uiselh, be m peza de vos,

XIV.

Gui d' Uiselh, be m peza de vos,

Quar vos etz laissatz de chantar,

E quar vos i volgra tornar:

Per que sabetz d' aitals razos,

Voill que m digatz si deu far engualmen 

Domna per drut, quan lo quier francamen, 

Com el per lieys tot quan tanh ad amor, 

Segon lo dreg que tenon l' amador.

Domna, Na Maria, tensos

E tot chant cuiava laissar;

Mas aoras non aus mudar

Qu' ieu no chant al vostre somos:

E respon vos de la domna breumen,

Que per son drut deu far comunalmen,

Com el per lieys, ses garda de ricor;

Qu' en dos amics non deu aver maior.

Gui, tot so don es cobeitos

Deu drutz ab merce demandar;

E domna deu l' o autreiar,

Mas ben deu esguardar sazos;

E 'l drutz deu far precx e comandamen,

Com per amigua e per domn' eissamen;

E domna deu a son drut far honor,

Com ad amic e no com a senhor.

Domna, sai dizen entre nos

Que, lai on domna vol amar,

Engualmen deu son drut honrar,

Quant engualmen son amoros:

E s' esdeve qu' ill l' am plus finamen,

Li dig e ill fag o devon far parven;

E s' a ves lieys fals cor ni trichador,

Ab bel semblan deu cobrir sa dolor.

Gui d' Uiselh, ges d' aitals razos

No son li drut al comensar;

Ans ditz cascus, quan vol preiar,

Mas junthas e de genolhos:

Domna, vulhatz que us serva humilmen

Com lo vostr' om; e s' ella enaissi 'l pren,

Ieu lo jutge per dreg a traydor,

Si s fai pariers e s det per servidor.

Domna, ben es plaitz vergonhos

Ad ops de domna razonar,

Que no tenha celui per par

Cui aura fag un cor de dos.

O vos diretz, e no us estara gen,

Qu' el drutz la deu amar plus leialmen;

O vos diretz qu' ill son par entre lor,

Que re no ill deu lo drutz mas per amor.

Gui d' Uisel et Marie de Ventadour.