47. Anonimo. Totas honors e tuig fag benestan

47. Anonimo.

Dal canz. I.

Totas honors e tuig fag benestan

foron gastat e delit e malmes

lo jorn que mortz aucis lo miel presan

el plus plasen q'ancmais nasques de maire,

lo valen rei Manfrei que capdelaire 

fon de valor, de gaug, de totz los bes; 

non sai cossi mortz aucir lo pogues. 

ai, mortz crudels, cum lo volguist aucir, 

quar en sa mort ve hom totz bes morir? 

Qu'era sen vai honors sola ploran 

que non es hom qu' ab se l'apel ni res, 

coms ni marques ne reis ques fass' enan 

ni la semo que venga a lor repaire. 

er a faig desonors tot qu' anc volc faire, 

qu' a for ostada honors de son paes 

e i sson cregut enjan tan e no fes 

qu' an revirat vas totas part lor gir 

c' a penas sai hom posc' om pros gandir. 

Ar vai son dol larguesa demanen 

disem al cavaliers paubres cortes: 

seingner, e que fairem desereinan, 

pos tolz nos es tan bos seingner e paire ? 

per Deu, non sai oimais que dejan faire.

conseillatz nos qu' anam al rei Frances? 

o al pro n'Adoart rei dels Angles ? 

e, si i anem, volran nos acuillir? 

gran paor ai que lor cara nos vir.

Enseingnamenz e valors que fan? 

on trobeiran manteing, pos vos noi es, 

seingner onratz, quels trasiatz enan ? 

tot temps iran ab dol ez ab maltraire, 

pos vos noi es qu' erras sos emperaire 

e seingner sobre totz qu' anc fon mes. 

non sai ons van quan tan lor es mal pres, 

no pogra mais anar tan ne venir 

qu' ancmais troben tan plaisem acuillir.

Dreitz e vertatz e vergoingna sen van, 

mensonia e tortz vergoingnatz de marvez 

remanon sai, mas trop mal camje fan 

nostre baron major al meu vejaire; 

quei vei troblar terra e foc, mar ez aire, 

quar regna falsetat, e bona fes

s' en vai de cors ez on lai troba res.

princ' e baron, mout ven degratz marir,

s' al cor aves talen de ben finir.

Partz totz los monz voill q' an mon serventes

e part totas las mars, si ja pogues 

homs trobar queil saubes novas dir 

del rei Artus e quan deu devenir.

Oi cobeitatz, vos e vostras arnes 

confonda Deus e totz vostres conres, 

qu' aves juen gastat, e faiz delir 

deport e jai ab vostre fals desir.

XL. Tos temps azir falsetat et enjan,

XL.

Tos temps azir falsetat et enjan,

Et ab vertat et ab dreg mi capdelh,

E si per so vauc atras o avan,

No m' en rancur, ans m' es tot bon e belh,

Qu' els uns dechai lialtatz mantas vetz,

E 'ls autres sors enjans e mala fes;

Mas si tant es qu' om per falsetat mon,

D' aquel montar dissen pueys en preon.

Li ric home an pietat tan gran

De paubra gen, com ac Caym d' Abelh;

Que mais volon tolre que lop no fan,

E mais mentir que tozas de bordelh:

Si 'ls crebavatz en dos locx o en tres,

No us cugessetz que vertatz n' issis ges

Mas messongas, don an al cor tal fon

Que sobrevertz cum aigua de toron.

Mans baros vey, en mans luecx, que y estan

Plus falsamen que veyres en anelh;

E qui per fis los ten falh atrestan

Cum si un lop vendia per anhel;

Quar els no son ni de ley ni de pes;

Ans foron fag a ley de fals poges,

On par la cros e la flors en redon,

E no y trob om argent quan lo refon.

Daus Orient entro 'l solelh colguan

Fas a la gent un covinent novelh;

Al lial hom donarai un bezan,

Si 'l deslials mi dona un clavelh;

Et un marc d' aur donarai al cortes

Si 'l deschauzitz mi dona un tornes;

Al vertadier darai d' aur un gran mon,

Si m don' un huou quecx messongier que y son.

Tota la ley qu' el pus de las gens an

Escriuri' eu en un petit de pelh,

En la meitat del polguar de mon guan;

E 'ls pros homes paysseria d' un tortelh,

Quar ja pels pros no fora cars conres; 

Mas si fos hom que los malvatz pagues, 

Cridar pogra, e non gardessetz on: 

Venetz manjar li pro home del mon.

Sel que no val ni ten pro per semblan,

Pros ni valen non tanh que hom l' apel

Ni vertadier, quan met dreg en soan,

Quan dreitura ni vertat non l' es bel;

Car qui fai mal ni tort, razos non es

Qu' en cueilla grat ni lauzor ni pretz ges;

E se ditz ben un reprochier pel mon:

Sel q' una ves escorja autra non ton.

A totas gens dic e mon sirventes

Que si vertatz e dreitura e merces

Non governon home en aquest mon,

Ni sai ni lai no cre valors l' aon.

Faidit, vai t' en chantar lo sirventes

Drech al Tornel a 'N Guigo, qui que pes,

Car de valor non a par en est mon

Mas mon senher En Ebles de Clarmon.

Pierre Cardinal.