Giraut de Cabreira, Ensenhamen.
non posc mudar
q'eu non chan, pos a mi sap bon;
e volrai dir,
senes mentir,
e comtarai de ta faison.
Mal saps viular
del cap tro en la fenizon.
Non sabz fenir
al meu albir
a tempradura de Breton.
Mal t'ensegnet
cel que t mostret
los detz a menar ni l'arson.
Non saps balar
ni trasgitar
a guiza de juglar guascon.
Ni sirventesc
ni balaresc
non t'auc dire nuilla fazon.
Bons estribotz
non t'eis pelz potz,
retroencha ni contenson.
Ja vers novel
bon d'en Rudel
non cug que t pas sotz lo guingnon,
de Markabrun
ni de negun
ni d'en Anfos ni d'en Eblon.
Jes gran saber
non potz aver,
si fors non eis de ta reion.
Pauc as apres,
qe non sabs jes
con eu tras portz
per son esfortz
intret en Espaign' a bandon;
de Ronsasvals
los colps mortals
qe fero'l dotze compaignon,
can foron mort
e pres a tort,
trait pel trachor Ganelon
a l'amirat,
per gran pechat,
et al bon rei Marselion.
Del Saine cut
c'aias perdut
et oblidat los motz e l son;
ren no n diçetz
ni no n sabetz:
pero no i ha meillor chanson.
E de Rotlan
sabs altretan
coma d'aiso que anc non fon.
Conte d'Artus
non sabes plus,
ni del reproier de Marcon.
Ni sabs d'Aiolz,
com anet solz,
ni de Machari lo felon;
ni d'Anfelis
ni d'Anseis
ni de Guillelme lo baron.
De Florisen
non sabs nien
ni de las ganas de Milon.
Del Loerenc
non sabs co venc
...
ni sabs d'Erec
com conquistec
l'esparvier for de sa reion.
Ni sabs d'Amic
consi guaric
Ameli lo seu compaignon.
