38. Ugo di Saint Circ e Nicoletto di Torino. Si madompna n'Alais de Vidallana

38. Ugo di Saint Circ e Nicoletto di Torino.

Dal canz. H.

N' Uc de San Sil (:)

Si madompna n'Alais de Vidallana

saubes cant eu sai a dompna valer, 

ni cum eu sai far semblar sobeirana

tota dompna q' eu voilla mantener, 

ja nom fora de solatz tan loingtana 

en son pais, cant eu l'anei vezer.

s' il no m' onret, oranz' ai en Breissana. 

n' Adonella, qes fai a totz plazer

ab cortes dichz et ab valor certaina.

Na Salvaga, d'aitan siatz certaina, 

qe lonjamenz de vos me fai plaizer

Lombardia e la Marcha e Toscaina.

Nicolez de Turin li respondet (:)

N' Uc de Saint Circ, sabers e conoissenza 

tolc a n'Alais, car nous ac bel solatz; 

car c' il en vos conoges la valenza 

ni lo saber qe vos avetz, cuidatz, 

ben mostrera tan bella captenenza, 

qe totz temps en foratz sos paiatz.

mas il no vos vi tant d'art ni de sabenza, 

qe de dompnas tant de be dir saçatz, 

c' aian granz laus per vostra mantenenza.

N' Adonella sai qe n' avia penedenza, 

car vos onret; e Salvaga nom platz, 

car vos acuoill nius fai bella parvenza.

35. Guglielmo de la Tor. La treva. Pos n'Aimerics a fait far mesclança e batailla

35. Guglielmo de la Tor. *

Secondo il testo edito dal Suchier (Denk. I, 323).

La treva.

Pos n'Aimerics a fait far mesclança e batailla 

de na Salvaga, on prez es e valors senz failla, 

e de na Biatrisz sa seror ques trabailla

de tot ço mantener c'a fina valor vailla, 

eu vueill far venir tals que partan lor barailla 

a treva, que non voill del tot la definailla.

Na Biatriz i ven d' Est cui fins prez capdella, 

del marqueset d'Est moiller, on valors renovella,

e de Ravenna i ven n' Esmilla cui apella

fis prez, e de Magon na Biatriz la bella,

e n'Alazaiz sa sor qui sap ja la novella,     (Azalaïs, Azalais)

e de Bresaina i ven madompna n'Adonella.

E de Soraigna i ven na Sandra la cortesa 

e na Berta en cui es beutaz e valors mesa; 

na Mabillia i ven qu' es de totz bes apresa. 

pueis i ven n'Agnes d'Arc on nuilz mals non adesa 

e de Casalot ven na Sufia c'an presa 

jois e prez e valors a lor part e conquesa. 

E de Ponçon i ven n' Esmilla la prezada,

de Cantacabra i ven la bella e l'ensegnada, 

na Caracosa, qu' es per los valens amada.

e de Sarzan i ven n'Aiglina la lauzada, 

e cellas de Plozacs cui jois e prez agrada 

venon a esperon a la treva nomnada.

De Luna eissamen i venon senz faillida 

las dompnas cui jovenz ni valors non oblida; 

e de Casellas pueis venon ses far gandida

las dompnas c'an fin prez ab proesa conplida. 

e de Romaigna i venon las dompnas cui jois guida 

e de Castel i ven na Bruna la grazida.

E del Carret i ven na Comtensos qui zenza

chascuns jorns en fin prez ez en fina valenza. 

e de Coissan i ven n'Averz c'a s'entendenza 

en mantener honor e fina conoissenza. 

aquestas qu'eu ai dit totas ses retenenza, 

venon las trevas far, qu'en aissi lor agenza. 

Aras vos dic que son vengudas ses doptanza

las dompnas e si fan enaisi l'acordanza, 

qu'en las doas serors non aian mais erranza, 

e que la terva dur ses far nulla mesclanza; (terva : treva : tregua)

e s'om de l'una di neguna ren d'onranza, 

que l'autra s' i acort e que n'ai' alegranza. 

Ez enaissi sera la lor trev' alegranza 

e plaira ben als pros lo plaiz e l'acordanza.

* Dalla Biografia, secondo il testo edito dallo Chabaneau (op. cit. p. 104): Guillem de la Tor si fon joglars e fon de Peiregorc, d'un castel qu' om ditz la Tor. e venc en Lombardia; e sabia cansos assatz e s'entendia e chantava ben e gen, e trobava; mas quan volia dire sas cansos, el fazia plus lonc sermon de la razon que non era la cansos. e tolc moiller a Milan... e la menet a Com...