40. Sordello. *
Della prima poesia do il testo ricostituito sui mss. A D I K dal De Lollis (nella edizione che sta preparando di questo trovatore); della seconda do il testo ricostituito sur mss. A C H I R S dal Meyer (Rec. d'anc. textes, p. 93).
Lo reproviers vai averan, som par,
d'ome escaudat qui tem tebe ancse;
c'us fals volpills qeis fai ab det mostrar,
tant fort se feing, a pres desobre se
mon sirventes, de cui qez eu faich l'aia,
car en son cor sap totz los mals qei son,
e pois per sieu lo pren, qui qu'el retraia,
far l'ai l'onor q'a lui l'autrei el don.
Ges nom degra de bausia reptar,
q'ieu sui leials et el tant fals q'en re
non ausaria ad un gat tornas far
nis fari' el del dreich c'auria be:
c'om que nuill temps non fetz colp ni pres plaia,
no m'es semblan pogues far nuill faich bon;
car aitant tost cum el s'arma s'esmaia,
c'anc hom d'aital fautonia non fon.
Ben a gran tort car m'apella joglar,
c'ab autre vau et autre ven ab me,
e don ses penre et el pren ses donar,
q'en son cors met tot qant pren per merce;
mas eu non pren ren don anta m'eschaia,
anz met ma renda e non vuoill guizardon,
mas sol d'amor, per qem par q'el deschaia
et eu poje, qui nos jutga a razon.
Car sol se sap peigner et afaitar
e car se feing tot jorn, non sap de que;
e car se sap torser e remirar,
cre qeis n'azaut tota domna de se.
mas eu non crei que pros domna s'atraia
vas tant vil cors per tant vil ochaison;
mas car als crois se taing dompna savaia,
trobar la pot sus el castel Babon.
En luoc d'ausberc fai camisa redar
e per caval vol amblan palafre,
et en luoc d'elm fai capiron fresar
e per escut pren mantel el rete.
e si per so ai d'amor ren qeil plaia,
reptar pot hom amor de tracion:
mas non o fai mas per semblanssa gaia
lo fals feignens, car al res noil ten pron.
Gen l'a saubut lo valens coms onrar
de Tolosa, si cois taing nis cove;
c'a Marseilla l'a faich a zaut tornar,
perque laisset son seignor e sa fe.
mas el non tem vergoigna ni s'esmaia,
don degr' estar marritz tota sazon
lo fals volpills q'a nom, car pauc s'essaia,
cor de conill ab semblan de leon.
Plaingner voill en Blacatz en aquest leugier so
ab cor trist e marrit, et ai en ben raso,
qu'en lui ai mescabat seignor et amic bo
e car tuit l'aib valen en sa mort perdut so.
tant es mortals lo dans qu' ieu non ai sospeiso
que jamais si reveingna, s'en aital guisa no
c'om li tragua lo cor e qu'en manjol baro
que vivon descorat, pois auran de cor pro.
Premiers mange del cor, per so que grans obs l'es,
l'emperaire de Roma, s'el vol los Milanes
per forsa conquistar, car lui tenon conques
e viu deseretatz malgrat de sos Ties.
e deseguentre lui manj' en lo reis Frances;
pois cobrara Castella qu'el pert per nessies.
mas, si pesa sa maire, el non manjara ges,
quar ben par a son pretz qu'el non fai ren queil pes.
Del rei Engles me platz, car es pauc corajos,
que manje pro del cor, pois er valens e bos,
e cobrara la terra per que viu de pretz blos,
quel tol lo reis de Fransa quar lo sap nuaillos.
e lo reis Castellans taing qu' en manje per dos
quar dos regismes te e per l'un non es pros;
mas, s' il en vol manjar, taing qu' en mange a rescos
que sil mair' o sabia, batria l'ab bastos. (batria'l ab)
Del rei d' Arago voil del cor deia manjar,
quez aisso lo fara de l' anta descargar
que sai pres de Marseilla e de Millau, c' onrar
nos pot estiers, per re que posca dir ni far.
et apres voil del cor don hom al rei Navar
que valia mais coms que reis, so aug comtar.
tortz es, quan Dieus fai home en gran ricor pojar
poi sofracha de cor lo fai de pretz baissar.
Al comte de Tolosa a obs qu' en manje be
sil membra so que sol tener ni so que te,
car si ab autre cor sa perda non reve
nom par que la revenha ab aquel qu' a en se.
el coms Proensals taing qu' en manje, sil sove
c'om que deseritatz viu gaire, no val re;
e sitot ab esfors si defen nis capte
obs l' es manje del cor pel greu fais qu' el soste.
Li barom volran mal de so quez eu dic be,
mas ben sapchan qu' ieuls pretz aitan pauc com il me.
Bel Restaurs, sol c' ab vos posca trobar merce,
a mon dan met chascun que per amic nom te.
* Biografia, secondo il testo edito dello Chabaneau (op. cit. p. 106):
Sordels fo de Mantoana, d'un castel que a nom Got, gentil catanis, e fo avinens hom de la persona, e fo bons chantaire e bons trobaire e grans amaire. mas mout fo truans e fals vas dompnas e vas los barons ab cui el estava. et entendet se en madompna Conissa, sor de ser Aicelin e de ser Albric de Romans, qu' era moiller del conte de Saint Bonifaci, ab cui el estava. e per voluntat de miser Aicelin el emblet madompna Conissa e menet lan via. e pauc apres & el s' en anet en Onedes ad un castel d' aquels d' Estrus, de ser Henric e de ser Guillem e d' en Valpertin, qu' eran mout siei amic. et esposet una soa seror celadamens, que avia nom Otha. e venc s' en puois a Trevis e quant aquel d' Estrus lo saup, si li volia offendre de la persona, eill amic del comte de Sain Bonifaci eissamens; don el estava armatz sus en la casa de miser Aicelin. e quant el anava per la terra, el cavalgava en bos destriers ab granda compaignia de cavalliers, e per paor d' aicels queil volion offendre, el se partic & anet s' en en Proenssa, & estet ab lo comte de Proenssa. et amet una gentil domna e bella de Proenssa; et apellava la en los sieus chantars que el fazia per lieis, Doussa enemia...
