N Uc Brunet ou Brunenc.
.jpg "N Uc Brunet ou Brunenc. Cuendas razos e novelas plazens")
2701, 7225, 7614, 7698.
Uc Brunet si fo de ciutat de Rodes, qu'es de la seignoria del Comte de Tolosa, e fo clergues; e apres be letras e saup ben trobar. Subtils era mot e de gran sen natural; e fes se joglars e fes motas de bonas cansos, mas non fetz sons. Et anet ab lo rei'n Anfos d'Arago, et ab lo comte de Tolosa, e ab lo comte de Rodes lo sieu seignor, et ab en Bernart d'Anduza, et ab lo Dalfi d'Alvernhe. Et entendet en una borzeza d'Orlhac, que avia nom madona Galiana; mas ela non lo volc amar ni retener, ni far negun plazer endreg d'amor: e tan qu'ela avia fag son drut del comte de Rodes, e donet comiat à 'n Uc Brunenc. Et adonc n Uc, per la dolor que el n'ac, mes se en l'ordre de Cartosa; et aqui el morí.
2701, 3794, 7225-6, C, M.
Cuendas razos e novelas plazens
E partam nos d'enois e de foldatz,
Et aprendam cortezias e sens:
Quar la foldatz ten dan mantas sazos,
E sen cortes es gaug onratz e bos.
Ab los joios deu hom esser jauzens,
E gen parlar ab los enrazonatz;
Quar aitan so de bos motz, si'ls cercatz,
Com de vilas e de desavinens:
E gen parlars ab avinens respos
Adutz amics e no creis messios.
Mas d'una res soi en greu pessamens;
Don viura joi si cantar l'es emblatz?
Ni co sera cors ben amans triatz,
Si ja non es ni jogans ni rizens?
Per cest o dic embroncatz cossiros?
E qui cujatz queus sia defendens,
Si avols es, qu'om nous apel malvatz?
Que temps avetz e poder vos es datz
E noi vezetz mentre'l lum es ardens.
Gardatz vos i que'l temps es tenebros
E noi veiretz quan lo lum er rescos.
Quar un perilh cor sobre totas gens,
Mortz, que desfai los comtes e'ls prelatz;
Per que val mais si fatz que si pensatz,
Qu'en pauc de temps i ven alongamens:
Pero lo fatz es avinens e bos
Que no s'i paus malvada ocaizos.
