La Comtessa de Dia.
7225, 7614.
Ab joi et ab joven m'apais,
E jois e jovens m'apaia;
Quar mos amics es lo plus gais,
Per qu'ieu soi coindet'e gaia,
E pois eu li soi veraia,
Be s taing qu'el me sia verais,
Qu'anc de lui amar no m'estrais
Ni ai cor que m'en estraia.
Mout mi platz, quar sai que val mais
Cel qu'ieu ai dezir que m'aia;
E cel que primiers lo m'atrais,
Dieu prec que gran joi l'atraia.
E qui que mal l'en retraia,
No creza fors so qu'ieu l retrais:
Qu'om coill mantas vetz lo balais
Ab qu'el mezeis se balaia.
Domna quez en bon pretz s'enten
Deu ben pauzar s'entendensa
En un pro cavallier valen;
Pos ilh conois sa valensa,
Que l'aus' amar à presensa:
E domna, pois am' à presen,
Ja pois li pro ni li valen
No'n diran mas avinensa.
Qu'ieu ai causit un pros e gen
Per cui pretz meillur'e gensa,
Larc et adreit e conoissen,
On es sen e conoissensa.
Prec li que n'aia crezensa,
Ni hom no l posca far crezen
Qu'ieu fassa vas lui fallimen,
Sol no trob en lui faillensa.
Amics, la vostra valensa
Sabon li pro e li valen,
Per qu'ieu vos quier de mantenen
Sius platz vostra mantenensa.
2701, 3794, 7225-6, 7614, M.
A cantar m'er de so qu'ieu no deuria,
Quar me rancur de cel cui soi amia;
Et eu l'am mais que nulla res que sia.
Ab lui no trob merces ni cortesia,
Ni no mi val ma beutatz ni mos sens;
Qu'enaissi soi enganad' e trahia
Com degr' esser si l fos desavinens.
D'aisso m conort quar anc no fis faillensa,
Amics, ves vos per nulla captenensa,
Ans vos am mais no fes Seguis Valensa;
E platz me mout qu'ieu del amar vos vensa.
Lo meus amics, quar etz lo plus valens,
Mi faitz orgolh en digz et en parvensa;
Et es humils ves totas autras gens.
Be m meravilh com vostre cors s'orgoilla,
Amics, ves me, don ai razon que m doilla.
Non es ges dreitz qu'autra domnaus mi toilla, (domna us)
Per nulla re queus diga nius acoilla;
E membre vos qual fo'l comensamens
De nostr'amor. Ja domnedieus no voilla
Qu'en ma colpa sia'l departimens.
Proeza gran qu'él vostre cors s'aizina
E lo ric pretz qu'avetz m'en ataïna;
Q'una non sai, londana ni vezina,
Si vol amar, ves vos no sia clina.
Mas vos, amics, es be tan conoissens
Que be devetz conoisser la plus fina;
E membre vos del nostre covinens.
Valer me deu mos pretz e mos paratges,
E ma beutatz, e plus mos fis coratges:
Per qu'ieu vos man lai on es vostr'estatges
Esta canso, que me sia messatges.
E volh saber, lo meus bels amics gens,
Per que m'etz vos tan fers ni tan salvatges,
Sius o fai far orgolhs o mal talens.
Aitan e mais volh queus diga'l messatges,
Qu'en trop d'orgolh ant gran dan mantas gens.
7225.
Estat ai en greu cossirier
Per un cavallier qu'ai agut,
E voil sia tostemps saubut
Com ieu l'ai amat à sobrier.
Ara vei qu'eu soi trahida,
Quar eu no li donei m'amor;
On ai estat en gran error
En leit e quan soi vestida.
Ben volria mon cavallier
Tener un ser en mos bratz nut,
Qu'el s'en tengra per errebut,
Sol qu'à lui fes se cosseillier.
Quar plus m'en soi abellida
No fis Floris de Blancaflor:
Mon cors l'autreji e m'amor,
Mon sen, mos oills e ma vida.
Bels amics, avinens e bos,
Quoraus tenrai en mon poder?
E que jagues ab vos un ser
E queus des un bais amoros.
Sapchatz gran talen n'auria
Queus tengues en loc de marit,
Ab so que m'aguesses plevit
De far tot so qu'eu volria.
Sainte-Palaye. Manuscrit de modène.
Fin joi me don' alegransa,
Per qu'eu cant plus gaiamen;
E no m'o teng à pezansa
Ni à negun pessamen,
Quar sai que son à mon dan
Aitals lausengier truan;
E lor maldis no m'esglaia,
Ans en son dez tans plus gaia.
En mi... inges Fransa
Li lausengier mal dizen;
Qu'om non pot aver honransa
Qui a 'b els acordamen;
Qu'ist son d'atretal semblan
Com la nivol quan s'espan,
Que'l solels en pert sa raia:
Per qu'eu non am gent savaia.
E vos gelos mal parlan
Nous cuges qu'eu m'an tarzan
Que jois e jovens no m plaia,
Per tals que dols vos descaia.
