Peire Bermon Ricas novas. En la mar major son e d'estiu e d'ivern,

Peire Bermon Ricas novas. (Bremon)

Florissait en 1235. Hist. génér. de Prov. T. II, p. 399.

2701, 3794.

En la mar major son e d'estiu e d'ivern,

E sai pron de la mar per que dreg m'i govern,

Si qu'enemic qu'ieu aia no pes que m descazern

De la mar on domnei; e no m part del estern.

Fals lauzenjadors rent als deabols d'ifern,

Qu'ieu no ls blan ni no ls tem una rusca de vern;

E sai n'un que s nafret tan lag quan fes l'esquern

Que no l gariran tug li metge de Salern.

A 'n Sordel man e prec, quar se fenh mos amics,

Que si'n Barrals me falh ni m ven tan gran destrics,

Qu'el m'essenh on tenrai, qu'el sap totz los abrics.

Mas no m tramet' à cel de cui s'es enemics

Quar la mula no l det, de que fo tan enics;

Molt laill ques francament, mas anc no l valc prezics.

E d'autres pres lur dos, quar d'Espanha venc rics,

Et apres de Peitau on dav' en Savarics.

Aras vei qu' à 'n Sordel es pojat sus él cap

Que ab son sirventes, don fa tan gran aclap

Que par qu'anbroc los vers o que'ls mescl' en enap,

Pero siei dig parescon ses coa ni ses cap.  (parescon)

Equar es tan arditz prec dieus que no m'atrap,

Qu'el fes tal ardimens qu'entre'ls Lombartz no cab;

Els rics homes conois de Trevisa tro Gap

E plus de cels d'Espanha: trop conois e trop sab.

Anc no fon en Sordel, que hom ten per rainart,

Cavaliers, per ma fe so m dis ad una part 

Joanet d'Albusson; si dis ver el so gart.

E si ja dels Lombartz partis un pauc plus tart,

Jamais à Cananillas no vengra far issart.

E si tot se fenh drutz, pecs es qui n'a regart:

Quar si tug son tan freg com el l'autre Lombart

No son bon ad amor; per sa molher m'en part.

Ans mos cors no s parti, tan no nevet ni ploc, 

Pos fui ben entaulatz del joc d'amor no s moc. 

Mot sai ab cavalier gen jogar et ab roc,

Et anc nuls hom sa domna plus gen cobrir no poc.

Mas en Sordel joguet adoncs ab lo badoc

Quan la fersa n'adus pres de si él deroc,

Per que fon del tot matz; don vesti trop lag floc,

Quar anc de joc d'amor pois no saup tener toc.

Del senhor de Leo dis tot lo mal que poc

Sordel, tan li es greu quan quier qui no l dis d'oc.

XXXIX, Per folhs tenc Polles e Lombartz

XXXIX.

 

Per folhs tenc Polles e Lombartz

E Longobartz et Alamans,

Si volon Frances ni Picartz

A senhors ni a drogomans;

Quar murtriers a tort

Tenon a deport;

Et ieu non laus rey

Que non guarde ley.

 

Et aura 'l ops bos estandartz

E que fieira mielhs que Rotlans,

E que sapcha mais que Raynartz, 

Et aia mais que Corbarans;

E tema meyns mort

Qu' el coms de Monfort,

Qui vol qu' a barrey

Lo mons li sopley. 

 

Mas sabetz quals sera sa partz

De las guerras e dels mazans?

Los critz, las paors e 'ls reguartz

Que aura fagz, e 'l dol e 'l dans

Seran sieu per sort.

D' aitan lo conort,

Qu' ab aital charrey

Venra del torney.

 

Ben petit val tos giens ni t' artz,

Si pertz l' arma per tos efans;

Per l' autruy carbonada t' artz,

E l' autruy repaus t' es afans;

Pueys vas a tal port

On cre que quecx port

L' enguan e 'l trafey

E 'ls tortz faitz que fey.

 

Anc Carles Martel ni Girartz

Ni Marsilis ni Aigolans

Ni 'l rey Gormons ni Yzombartz

Non aucizeron homes tans

Que n' aion estort

Lo valen d' un ort;

Ni non lur envey

Thezaur ni arney.

 

Non cug qu' a la mort

Negus plus enport

Aver ni arney,

Mas los faitz que fey.

 

Pierre Cardinal.

 

XII, Pus partit an lo cor En Sordel e 'N Bertrans

XII.

 

Pus partit an lo cor En Sordel e 'N Bertrans

De l' adreg En Blacas, plus me non suy clamans;

Ieu partirai lo cors en mantas terras grans,

Lay un cartier auran Lombartz et Alamans

E Polia e Rossia e Frissa e Braymans;

Trastut vengan en Roma adhorar lo cors sans,

E fassa y tal capela l' emperayre prezans

On pretz sia servitz, joys et solatz e chans.

 

L' autre cartier auran Franses e Bregonhos,

Savoy' e Vianes, Alvernhas ab Bretos,

E 'l valens Peytavis, car lor platz messios; 

E s' ilh coart Engles y fan confessios,

No son tan malastruc que pueys no 'l trop hom bos;

Qu' el cors sans es pauzatz en loc religios,

E 'l reys cui es Paris gart lo be dels bricos,

Ab sen et ab largueza, qu' en aysi sera bos.

 

Lo ters cartier auran li valen Castelan,

E vengan l' azorar Gascon e Catalan

Et Aragones, car an fin pretz e prezan;

E si 'l rey de Navarra y ven, sapcha de plan,

Si non es larcx e pros, jes del cors non veiran;

Qu' el bon rey Castelan lo tenra en sa man,

Que donan e meten lo cors sans gardaran,

C' aysi renhet sos auis ab fin pretz sobeyran.

 

Lo cart cartier aurem nos autri Proensal,

Car si 'l donavam tot, trop no' 'n penria mal;

E metrem l' a San Gili, com en loc cominal:

E vengan Roergas e Tolzas atretal

E silh de Bederres, si volon pretz cabal,

C' ueymay auran li comt patz ab amor coral;

E gardara s cascus per mon vol a son sal,

Car grans cortz mentauguda ses donar res no val.

 

La testa del cors sans trametray veramen

Lay en Iherusalem, on dieus pres naysemen,

Lay al Saudan del Cayre, sol pren batejamen,

E presenti 'l la testa, may estiers la y defen;

E Gui de Guibelhet, car a fin pretz valen,

Garde be la vertut per la payana gen;

E si 'l rey d' Acre y ven, lays cobeitat d' argen,

E sia larcx e pros, e gart ben lo prezen.

 

Pus dieus a preza l' arma d' En Blacas francamen, 

Say serviran per luy man cavayer valen.

 

Pierre Bremon, de Noves. (Peire Bremon Ricas Novas)