Lo Vescoms de Sant Antoni, Antonin. Lo clar temps vei brunezir

Lo Vescoms de Sant Antoni. (Antonin)

7614.

Lo vescoms de Saint Antonin si fo del evescat de Caortz, seigner de Saint Antonin e vescoms. Et amava una gentil domna moiller del seignor de Pena d'Albiges, d'un ric castel e fort. La domna gentils e bella e valens, e mout prezada e mout honrada; et el mout valens et enseignatz, e larcz e cortes, e bos d'armaz, e bels et avinens, e bon trobaire. Et avia nom Raimon Jordan; la domna era apellada la vescomtessa de Pena. L'amors dels dos si fo ses tota mesura, tant se volgren de ben l'us à l'autre.

Et avenc si qe'l vescoms si anet una vetz en garnimen; e si fo una batailla grans, el vescoms si fo nafratz à mort. E fo dich per sos enemicz q'el era mortz; et ela de gran dolor que n'ac si s'en anet ades, e si s rendet en l'orden dels Eretges. E si cum dieus volc lo vescoms garic de la nafra e meilloret, e negus noil volc dire q'ela i s fos renduda. E qan fon ben garitz el s'en venc à Saint Antonin, e fon li dich cum la domna sera renduda, per la tristessa qu'il ac de lui qand ill auzi q'el era mortz. 

Dond el perdet solatz e ris et alegressa, e cobret plains e plors et esmais, ni non cavalguet ni anet d'entre bona gen. Et estet enaissi

plus d'un an, don totas las bonas gens d'aquellas encontradas n'aviant gran marrimen. Don madona Elis de Monfort, qu'era moiller d'en Guillem de Gordon, filla del vescomte de Torena, on era jovens e beutatz e cortezia, li mandet pregan mout avinenmens que per la soa amor se degues alegrar: qu'ieu vos fatz de mon cors e d'amor prezen del mal que vos avetz pres; e prec vos eus clam merce que vos me vengatz vezer. Qan lo vescoms entendet los honratz plazers que la domna li mandava, s'ill comenset una gran doussors d'amor venir al cor; et adoncs el se comenset alegrar et esgauzir, e venir entre las bonas gens. E vestic se e sos compaignos et appareillet ben et honradamen, et anet à madomna Elis de Monfort; et ella lo receup ab gran plazer et ab gran honor q'el li fetz. Et el fon gais et alegres del honor e dels plazers q'ela il fetz e ill dis; et ela mout alegra de la bontat e de la valor qu'ill trobet en lui, ni no fo pas enpentida dels plazers ni de las amors qu'ill l'avia mandadas. E la saup ben grazir, e preguet la q'ela ill fezes tan d'amor per que el saubes que per dreich cors l'avia mandatz los plazers plazen, dizen qe'ls portava en son cor totz jorns escritz. E la domna o fetz ben, qu'ella lo pres per son cavallier e receup son omenatge; et ella se det à lui abrassan e baizan, e il det l'anel de son det per fermansa e per segurtat.

Et enassi se parti lo vescoms de la domna gais e joig, e tornet en cantar et en alegransa; e fetz adonc la chanson que dis:

Vas vos soplei en cui ai mes m'entensa.

Et enans qu'el fezes la chanson, una nuoich qand el dormia li fon vejaire que amors l'assaillis d'una cobla, que dis:

Raimon Jordan, de vos eis voil aprendre

Cous es laissatz de solatz ni de chan.

Ja soliatz en domnejar entendre

Mout leialmen, so faziatz semblan,

Eus feigniatz eus en faziatz gais;

Mas aras vei qu'avetz fenit lo lais:

Encolpatz etz si non es qei responda.

7225-6.

Lo clar temps vei brunezir

E'ls auzeletz esperdutz,

Que'l fregz ten destregz e mutz

E ses conort de jauzir.

Donc eu que de cor sospir

Per la gensor re qu'anc fos

Tan joios

Son, qu'ades m'es vis

Que folh' e flor s'espandis.

D'amor son tug miei cossir, 

Qu'al sieu servir soi rendutz;

E pois tan d'onor m'adutz

Ben o dei à deu grazir 

Que'l meils del mon sai cauzir. 

Si s fera quascus de vos

Volentos,

Sius o acuillis

La bella cui soi amis.

Sos amics son e serai 

Aitan quan la vida m dur; 

E no crezatz que m pejur, 

Enans mi meillurarai:

Que'l païs on el' estai

Azor, soplei et acli

Ab cor fi;

E lai vir soven

Mos olhs, tan l'am finamen.

Ailas! tan destressa m fai

De lei vezer tor e mur! 

Mas d'aisso m'en asegur

Per un messatgier qu'ieu n'ai, 

Mon cor que soven lai vai;

E conorta m'enaissi

Qu'endreg mi

Non au ni enten

Prec d'amic ni de paren.

En lei son tut mei cofort

E ves autra no m destolh, 

Ni null'autra non acolh

Que ja l deman dreg ni tort.

Que la bona fe que l port

M'a si mon coratj' assis

E devis,

Qu'ieu non ai poder

De null'autr' amor voler.

E s'ieu en dic mon conort

No m'o tengas ad orgolh:

Quar eu l'am tant e la volh,

Que, s'era coita de mort,

No querri' à deu tan fort

Que l'ai sus en paradis

M'acoillis,

Com que m des lezer

D'una noitz ab liei jazer.

Si com ieu dic ver

Mi don dieus ab liei jazer.