XXV, Ab grans trebalhs et ab grans marrimens

XXV.

Ab grans trebalhs et ab grans marrimens

Veyrem hueymais cristiantat estar,

Pus mortz es selh qu' era del mon ses par,

Qui valia sobre totz los valens,

Qu' era de cor per Ihezu Crist issitz

Del sieu pays contra 'ls fals Turcx aunitz, 

E dieus a 'l pres e trach d' aquesta vida, 

Pero non l' er trop esta mortz grazida.

Mortz es lo reys don em trastotz perdens

Tan que lunhs hom no pot ben adysmar,

E ges per so sa mortz no ns deu membrar,

Ans devem mielhs pus afortidamens

Totz anar lay ab armas, gent garnitz

Per secorre a selhs qu' elh a gequitz

E per amor, qu' el dans e la fallida

Restauressem en alquna partida.

Ar fora temps qu' om se crozes breumens,

E clercia o degra prezicar

Per tot lo mon, e tal perdon donar

Qu' om s' en crozes pus afortidamens;

Et en aissi los Francx foran seguitz

Et ajudatz e trop pus afortitz;

Mas la gleiza esta tan endurmida

Que de passar negus homs non covida.

Ans vos dirai que fan cominalmens

Selhs que la crotz solian far levar;

Elhs per deniers las fan a moutz laissar:

E degron mielhs prezicar a las gens,

Quar moutz n' estan sai flacx et adurmitz,

Quar del crozar nulhs prezicx no y 's auzitz;

E del prezic degra s movre tals crida

Per que s crozes la gens pus afortida.

Si per lo mon fos bos acordamens

Que cristias se denhesson amar

E s volguesson contra 'ls Turcx acordar

Non lur foro ja pueys trop defendens,

Ans cre fosso totz mortz o escofitz,

E la terra, on ylh se so noyritz,

Per cristias fora leu conquerida,

Que ja lunh Turc non trobera guandida.

Maires de dieu, verges emperairitz,

Pus pres avetz aquelh que ns era guitz,

Al rey Felips donatz longamens vida,

E gardatz lo de dan e de falhida.

Raimond Gaucelm.

XXIV, Qui vol aver complida amistansa

XXIV.

Qui vol aver complida amistansa

De Ihesu Crist, e qui 'l volra servire,

E qui volra lo sieu nom enantire,

E qui volra venjar la deshonransa

Qu' elh pres per nos, quan sus la crotz fo mes, 

Passe tost lai on elh fon trespassans,

E sia be de sa mort demandans

E de l' anta qu' el per nos autres pres.

Dieus pres, per nos salvar, greu malanansa,

Qu' en fon batutz e 'n suffri tal martire

Que sus la crotz en volc penden murire

Ab gran dolor, e y fo plagatz de lansa,

Per que 'l so fals trastotz, quan be m' o pes,

Aquelhs que so del passatge duptans;

Mielhs lai deuram quascus anar enans

Nutz o descaus qui estiers no pogues.

Mas trop d' omes son qu' eras fan semblansa

Que passaran, e ges non an dezire;

Don se sabran del passar escondire

Ganren d' aquelhs, e diran ses duptansa:

Ieu passera, si 'l soutz del rey agues;

L' autre diran: Ieu no suy benanans;

L' autre diran: S' ieu non agues efans,

Tost passera, que say no m tengra res.

Veus quals sera d' aquelhs lur escuzansa;

Mas, s' als no y fan, dieus lur sabra ben dire

Al jutjamen, segon lo mieu albire:

“Anc vos autres non demandetz venjansa

De la mia mort, per so siatz a mal mes.” 

Et als autres, qu' auran suffertz affans

Per la su' amor, dira: “Los mieus amans,

Venetz a mi, que tot m' avetz conques.” 

Aquels auran tos temps mais alegransa,

Mas los autres auran dol e cossire;

Doncx si ns volem nos altres far grazire

A Ihesu Crist que tot quant es enansa,

Passem non lay on elh fon per nos pres

Cominalmens trastotz ab bos talans?

Et en aissi serem li agradans;

Doncx passem lay, que temps e razos es.

Qui passara dieus qu' a fag tot quant es

Li secorra, e 'lh sia ajudans,

E 'lh do 'l regne don ieu suy esperans,

E li perdo, e 'lh valha en totas res.

Amicx Miquels, digatz m' el sirventes

A 'N Aymeric de Narbon' en chantans,

E digatz li que non sia duptans,

Que, si 'lh passa, pus tost n' er tot conques.

Raimond Gaucelm.