Mosenher En Peire, Reis d'Arago, Peire Salvatge, Lo Coms de Fois. Peire Salvatg' en greu pessar

Mosenher En Peire, Reis d'Arago; Peire Salvatge; Lo Coms de Fois.

7225-6.

Peire Salvatg' en greu pessar

Me fan estar dins ma maizo

Las flors que sai volon passar,

Senes guardar dreg ni razo.

Don prec aicels de Carcasses

E d'Agenes,

Et als Gascos prec que lor pes

Si flors me fan mermar de ma tenensa:

Mas tal cuja sai guazanhar perdo,

Que perdos l'er de gran perdicio.

E mos neps que sol flors portar

Vol cambiar, don no m sap bo,

Son senhal; et auzem comtar

Que s fai nomnar rei d'Arago.

Mas cui que plass' o cui que pes,

Los meus jaques

Se mesclaran ab seus tornes,

E volha dieus que'l plus dreituriers vensa;

Qu'ieu ja nul temps per bocel de Breto

No laissarai lo senhal del basto.

Si midons quez a cors cortes

Ples de totz bes,

Salvatge, valer mi volgues

E del sieu cors me fes qualque valensa;

Per enemics no m calgra garniso,

Ab sol qu'ieu vis la sua plazen faisso.

Resposta de Peire Salvatge.

Senher, reis' qu'enamoratz par

Non deu estar ab cor felo

Contra flors, ans deu arbirar

Com posca far al bon resso

Culhir las flors en aquel mes

On l'estiu es

E las flors naisson plus espes:

E'ls culhidors sian d'aital valensa,

Qu'en poig ni plan, en selva ni boisso

No laisson flor de sai Monmelio.

Lo Coms de Fois.

7225.

Mas qui a flor se vol mesclar

Ben deu gardar lo sieu baston,

Quar Frances sabon grans colps dar

Et albirar ab lor bordon.

E nous fizes en Carcasses

Ni en Genes,

Ni en Gascon, quar no l'amon de res

De pos vas mi ai faita la falhensa.

En breu de temps veirem mos Brogoignon

Cridar Monjoi; el criden Aragon.

Raimons de Miraval. Amors me fai cantar et esbaudir,

Raimons de Miraval.

2701, 7225, 7614, 7698.

Ramun de Miravals fo us paubres cavalliers de Carcasses, que non avia mas la quarta part de Miravals; et en aquel castel non estavo 40 homes. Mas per lo seu trobar e per son bel dire, e car el saup plus d'amor et de domnei, e de totz los faitz avinens, e de totz los ditz plazens que corron entr'amadors et amairitz, el fo amat e tengut car per lo Coms R. de Toloza, qu'el clamava son Audiart, et el lui. El coms li dava caval et armas, els draps que besoignaven, e so que l fazia mestier. Et era senher del alberc de lui, e senher del rei P. d'Arago, e del vescoms de Bezers, e d'en Bertran de Saissac, e de totz los grans baros de aquela encontrada. E non era neguna gran domna ni valens que no dezires e no se penes que el entendes en ela, o que li volgues be per domesteguessa, quar el las sabia pus onrar e far grazir que nuls autr'om; per que neguna no crezia esser presiada, si no fos sos amics Raimons de Miraval. E R. de Miravals s'entendet en mantas domnas, e'n fetz mantas bonas cansos; 

e no se crezet mais qu'il de neguna endreg d'amor agues ben, e totas l'enganeren.

Ben avetz auzit R. de Miravals qui fo ni don, per qu'ieu vos vuelh dire mais de son fag. Don el amava una dona de Carcasses que avia nom na Loba de Puegnautier, filha d'en R. de Puegnautier; et era molher d'un cavayer ric e poderos de Cabaret, pariers del castel. La Loba si era sobreavinens e voluntoza de pretz e d'onor; e tug li baro de la encontrada e li estranh que la vezian entendian en ela: lo Coms de Fois, en Olivier de Saissac, en P. Rotgier de Mirapeys, en Aimeric de Monrial, en P. Vidal, que fes mantas bonas cansos de lieis. En R. de Miravals si l'amava mais que totz, e la metia enans à son poder ab sas cansos e en comtans, com sel que o sabia meils far de cavalier del mon, et ab plus plazens razos et ab plus bels digz. E la Loba per lo gran pres en que el l'avia meza, car conoissia qu'el la sabia enansar fort e dezenansar, ela li sofria sos precs e l prometia de far plazer endreg d'amor, e l'avia retengut baizan. Mas ela o fazia tot per engan, et amava lo coms de Fois tan que ela ne avia fag son drut. Et era l'amor paleza de lor per tota la encontrada de Carcasses, don ela fon descazucha de pres e de honor e d'amics: que lai tenian per morta tota domna que fassa son drut d'aut baro.

En Miravals auzi la novela del mal c'avia fag, e que P. Vidal n'avia facha una mala chanso d'ela que di:

Estat ai una gran sazo;

en la cal el dis en unas coblas:

Mot ai mon cor felo

Per lieis que mala fo.

Miravals fo sobre totz pus dolens, et ac voluntat qu'en diches mal e en decazer ponhes; e pueis pesset se que mai valia que ponhes en ela enganar, aisi com el' avia lui enganat: e comensa la à defendre, à cobrir e à razonar del fag del Comte. La Loba auzi que Miravals la defendia del mal que avia fag, sobre la gran tristeza qu'el avia. Si s'alegra molt per la defensio de Miraval, per so qu'ela avia major paor del que de totas las autras gens. E sill fai venir à se e sill regrasia molt en ploran del mantenemen e de la defensio qu'el fazia d'ela; e si li dis: Miraval, s'ieu anc jorn agui pretz ni honor, ni amic ni amiga, ni fos auzida ni prezada luenh ni pres, ni aigui ensenhamen ni cortezia, per vos m'es tot avengut e de vos o tenh. E cum so sia causa que ieu non ai fag tot so que vos aves volgut endreg d'amors, no m'o a vedat amor d'autrui, mas una paraula que vos disses en una vostra canso, que ditz:

Amor me fai cantar et esbaudir...

Bona domna no s deu d'amor gequir;

E pus tan fai qu'ad amor s'abandona,

No s'en coch trop ni massa non o tir,

Que mens en val tot fag que dessazona.

Et ieu volia vos far tan de plazer ab onrada razo, per que vos l'acsetz plus car, que no m'en volia cochar; que non a mais dos ans e cinq mes que vos retengui baizan, si com vos diches en vostra canso:

Passatz so cinq mes e dui ans

Qu'ieu vos retengui à mos comans.

Aras vei be que vos no m voles abandonar, per lo blasme fals e mensongier que m'aun mes enemix et enemiguas de sobre me. Per so vos dic que pos vos me mantenes contra tota gent, et ieu me tuelh de tota autra amor per vos, e don vos lo cor e'l cors per far tot cant que vulhatz; e met me del tot en vostre poder e en vostras mas, e prec vos que m defendatz à vostre poder. Miraval ab gran alegreza receup lo don de la Loba, et ac de lieis tot so que à lui plac longa sazo. Mas denan s'era enamorat de la marqueza de Menerba, qu'era joves e gaia e gentils domna; e non avia mentit ni enganat, ni era estada enganada ni traïda. E per aquesta se parti Miravals de la Loba, per que fez aquesta canso que dis:

S'ieu en cantar soven

No m'atur ni m'aten,

Non cujetz que sabers

M'en falha ni razos.

la quals es aisi.

Vos avez entendut d'en R. de Miravals co saup enganar la Loba e remaner ab lieis en patz. Mas ar vos dirai de n'Alazais de Boissazon com l'enganet; et una autra apres qu'era sa vezina, na Esmengarda de Castras, et el dezia hom la bela d'Albeges. Abdoas ero de l'avescat d'Albi: n'Alazaitz era d'un castel quez a nom Lombes, molher d'en Bernat de Boisazo; na Esmengarda si era d'un borc quez a nom Castras, molher d'un ric valvassor qu'era fort de temps.

Miravals s'enamoret de n'Alazais qu'era joves e gentils e bela, e voluntoza de pretz e d'onor e de lauzor. Ecar ela conoissia que Miravals li podia plus donar de pretz que nuls hom que fos, si fo molt alegra car vit qu'el l'amava; e fetz li totz los semblans e los plazers que dona pot far à home. Et el la enanset cantan e comtan à son poder, e de lieis fes motas bonas chansos. E mes la en tan gran pretz, que totz los baros de aquela terra entendero en ela; lo vescomte de Bezers, e'l Coms de Toloza, e'l rei Peire d'Arago, als cals Miravals la avia tan lauzada, que'l reis ses vezer s'en era fort enamoratz, e l'avia mandatz sos messatges e sas joias. 

Et el ac voluntat de lieis vezer; e Miravals ponhet mot com el la vis, e fetz una cobla en sa chanso que dis:

Ar ab la forsa del freis...

S'à Lombers corteja'l reis

Per tostemps er jos ab lui;

E si tot s'es sobradeis

Per un ben en venran dui:

Que la cortezi' e'l jais

De la bella n'Alazais,

E'l fresca color e'l pel blon

Fan tot lo segle jauzion.

Donc lo rei s'en venc en Albiges à Lombes per vezer n'Alazaitz; en Miravals venc ab lo rei, pregan lo rei que'l li degues valer ab madomna n'Alazais. Fort fo ereubutz et onratz lo reis, e vegut volentiers madomna n'Alazaitz. El rei, tantost can fon assegut per apres d'ela, la preguet d'amor; et ela autrejat de far tot so que volria. Si que la nueg ac lo rei tot so que volc; el lendema fo saubut per tot lo castel e per tota la cort del rei. En Miravals, que atendia esser rics de joi per prec del rei et auzi aquestas novelas, fo fort marrit; et anet s'en e laisset lo rei e la dona. Longamen se plais del mal que avia fag la dona, e de la felonia que'l rei avia facha de lui; don el per aquesta razo fe esta chanso:

Entre dos volers soi pessiu.

Can lo Coms de Toloza fon deseretatz per la guerra e per los Frances, et ac perdut Argensa e Belcaire; e li Frances agro San Gili e Albiges e Carcasses; e Bederres fon destruitz e'l vescomte de Bezers era mort, e tota la bona gen d'aquela encontrada foro morta e guandida al Coms, ab cui el se clamava'n Audiart, el vevia ab gran dolor, per so que tota la bona gent, de cui era lo Coms senher e maystre, e donas e cavaliers ero mortz e deseretatz. Pueis avia sa molher perduda, aisi com auziretz, e sa dona l'avia traït e avia son castel perdut. Avenc se que'l reis d'Arago venc à Toloza per parlar ab lo Comte, e per vezer sa seror madona na Elionor e madona Sancha. E confortet mot sa seror e'l Comte e sos filh, e la bona gen de Toloza. E promes al Coms qu'el li rendria e cobraria Belcaire e Carcassona, et à Miravals lo sieu castel; e que la bona gen cobraria lo joi que avia perdut. En Miravals, per joi qu'el ac de la promessio que'l rei fes al Comte et à lui de rendre so qu'avion perdut, e per lo tems d'estat qu'era vengutz, ja agues el preponut de no far cansos entro quez agues cobrat lo castel de Miraval que avia perdut, e car s'era enamorat de madona na Helionor, molher del Comte, qu'era la plus bela dona del mon e la melhor, à cui el non avia encaras fag semblan d'amor, fes esta canso que di:

Bel m'es qu'ieu chan e condei

Pos l'aur'es dossa e'l temps jai.

E cant ac facha la canso la trames en Arago, per que'l rei venc ab mil cavayers à servizi del Comte, per la promessio qu'el avia facha. Don lo rei fon mortz per los Frances denan Murel ab totz los mil cavayers que avia ab se, que negus non escapet ab vida.

Dig vos ai de n'Alazais de Boisazo com engannet Miravals e si meteusa auci; ara vos vuelh dir com na Esmengart de Castras saup que n'Alazaitz l'avia escarnit, mandet per en Miravals. Et el venc, et ela l dis que mot era dolenta de so que se dizia de na Alazais, don ela avia cor e voluntat de far esmenda à lui de se mezeissa, del mal que li avia fag n'Alazais. 

Et el fon leu per enganar, can vit los bels semblans e'ls bos ditz ab qu'ela li presentava l'esmenda del dan qu'el avia pres; e dis li que voluntiers voldria prendre de lieis la esmenda. Et ela pres lo per cavalier e per servidor; e Miravals la comenset à lauzar et à grazir, et à enansar son pretz e sa valor. E la dona avia sen e saber e cortezia, e saup gazanhar amics et amigas. En Olivier de Saissac, que era un gran bar de la terra, si entendia en ela e la pregava de penre per molher.

En Miravals, can vi que l'avia tan montada en pretz et en onor, volc gazardo; e si la preget que li fezes plazer endreg d'amor. E ela dis que no faria plazer de drudaria, qu'enans lo pendria per marit, per so que lur amor no s pogues partir ni s rompes; e quel degues partir sa molher de se, laqual avia nom madona Gaudairenca. Don Miravals fon fort alegres e jauzens cant auzit que per marit lo volia; e anet s'en al sieu castel, e dis à sa molher que no volia molher que saupes trobar, que assatz avia en un alberc d'un trobador; e que se aparelhes d'anar ves l'alberc de son paire, qu'el no la tenria plus molher. Et ela entendia en un cavayer que avia nom Guillem Bremon, don ela fazia sas dansas. Cant ela auzi so que en Miravals li dis fes se fort irada, e dis que mandaria per sos parens. 

E mandet per en G. Bremon que vengues, que ela lo pendria per marit e s n'iria ab el. G. Bremon cant auzi las novelas fo molt alegres; e pres cavaliers e venc s'en al castel d'en Miraval e desmontet à la porta. E na Gaudairenca o apres, e dis à'n Miraval que siei amic eron vengut per lieis, e qu'ela s'en volia anar ab lor. Miravals fo molt alegres e la dona plus. La dona fo aparelhada d'anar; en Miravals la menet fora e troba en G. Bremon e sa companha e receup los fort. Can la dona volc montar él caval e ela dis à'n Miraval, que pus qu'ela volia partir de liei, que la des à'n Guilhem Bremon per molher. Miravals dis que voluntiers, si ela o volia. En G. se trais enan e pres l'anel per espozar; en Miraval la l det per molher e menet la'n.

Can Miraval ac partida sa molher de se, anet s'en à madona na Imenjarda; e dis li qu'el avia fag son comandamen de sa molher, e qu'ela denhes faire e dir e li atendes so que li avia promes. E la dona li dis que ben avia fag; e que s'en tornes à son castel e que fezes son aparelhamen de far grans nossas e de recebre lieis per molher, car ela mandaria tost per el. Miravals s'en anet e fes gran aparelhamen per far nossas. Ela mandet per n Olivier de Saissac, et el venc tost: et ela l dis co ela faria tot so qu'el voldria, e'l penria per marit. Et el fo lo plus alegres hom del mon; e acorderon aisi lur fag que'l ser la'n menet al sieu castel, e l'endeman l'espozet e fes grans nossas e gran cort.

Las novelas vengro à'n Miravals que la dona avia pres n Olivier de Saychac per marit. Fort fo dolen e trist, car l'avia fag sa molher laissar, e que l'avia promes que l prendria per marit, e que n'avia fag son aparelhamen de nossas; e dolens de n'Alazais del mal qu'ela avia fag ab lo rei d'Arago: e si perdet tot joi e tot alegrier e tot solatz, e cantar e trobar. E estet com hom esperdutz ben dos ans; e mans cavaliers trobador se trufavon de lui per los esquerns qu'en fazian. Mas una gentil dona que avia nom Brunessen, molher d'en P. Rotgier de Cabaret, que era envejoza de pretz e d'onor, si mandet saludan e pregan e confortan à'n Miravals que s degues alegrar per l'amor de lieis: e que saubes per veritat qu'ela l'anaria vezer si no volia venir vas lieis, e li faria tan d'amor, qu'el conoisiria be que no l volia enganar. E de aquesta razo fes esta chanso que di:

Ben aia'l messatgier.

2701, 7225-6, 7698.

Amors me fai cantar et esbaudir,

E m tol deport ab cossirier que m dona,

E torna tot mon solatz en cossir;

Que si non es ma canso sobrebona

Non dei esser aissi del tot blasmat:

Pero si cug cantar à voluntat

D'entendedors e de drutz e d'amigas.

Mas no vol ges à domnas cossentir

So per qu'à dreg vei qu'om las ocaizona,

Que tals n'i a que no volon cauzir

El temps qu'om plus d'amar las arazona:

Pois quan joven lor estrai sa beutat

Prendo'l sordeis qu'avian soanat,

Aissi com fes lo Lombartz de las figas.

Bona domna no s deu d'amor gequir;

E pos tan fai qu'ad amor s'abandona,

No s'en coch trop ni massa non o tir,

Quar mens en val tot frutz que dessazona:

Mas sapcha gen celar tota vertat,

Que cilh qu'en als li serian privat

Ad ops d'amar li serian destrigas.

Ges la bella qu'ieu plus am no s'albir

Qu'en re l'ensenh ni l casti ni l despona,

Qu'ilh sab tan be laissar e far e dir

Per que no m cal que ren als hi apona.

E si li platz que m retenh' à celat,

Per tres razos don li drut son amat

Li serai bos, messatgiers so li m digas.

S'ieu ja res fauc don madomna s'azir

No'lh perdon dieus si ella m'o perdona;

Quar no la volh galiar ni trazir, 

Ni razonar so qu'ella m mal razona. 

Tot m'es honors quant à lieis si' onrat, 

E grazisc tot quant à lieis ven à grat; 

E voll n'aver guerras et enemigas.

Bona domna, on qu' aia domnejat,

Volh que tengas Miraval domenjat;

E mas cansos en cap d'autras amigas.

Si tot m'aves, Mais d'amic, cor irat,

A vostr' ops ai Miraval si gardat,

Que vos l'aves et ieu n'ai enemigas.

Mantel, de sen, de pretz e de beutat 

E de joven vos vei tan gen honrat, 

Que sai ne son mantas domnas enigas.

2701, 7225-6, 7698, M.

Ar ab la forsa del freis,

Quan tot lo mons trembl'e brui,

Val mais solatz e domneis,

E cants e totz bel desdui,

Qu'él temps quan folh' e flor nais:

A celui qu'es pros e gais,

Contra l'us del temps e del mon,

Be par que bon cor li aon.

La gran beutatz que pareis

En la bella cui hom sui,

El ric pretz qu'à tot jorn creis

M'an tout domnejar d'autrui.

Mas un dous esguart m'atrais

Vas liei servir, don jamais 

No temsera fam, freg ni son,

S'agues cor del dig que m respon.

En amors a mantas leis,

E de mantas partz adui

Tortz e guerras e plaideis.

Leu reven e leu refui,

Leu s'apai' e leu s'irais:

E qui d'aisso l'es verais

Soven sospira de prion,

E mantz enois blan e rescon.

Anc mais ni tan no m destreis: 

Mas er ai trobat ab cui

Mi mou paors et esfreis,

E m cass' e m pren e m destrui.

Et ieu ges per tan no lais 

Que l'ai don me mou l'esglais

No tenha mon cor deziron,

On plus lo dezir me cofon.

Pero, si tot m'es gabeis,

Mos bos respietz m'i condui;

E si m dizia sordeis,

No volh tornar lai don fui.

Pos vengutz es à l'assais 

Poder a que m derc o m bais;

Qu'ieu no fug si m ras o si m ton, 

Ni ja no volh saber vas on.

S'à Lombers corteja'l reis

Tostemps mais er joi ab lui;

E si tot s'es sobradeis,

Per un be li'n venran dui:

Que la cortezi' e'l jais

De la bela n'Azalais,

El fresca color e'l pel blon

Fan tot lo segle jauzion.

Domna tan vos soi verais

Que de totz cortes assais

Volh que Miraval vos aon;

Mas nous volh dir quals es ni don.

Per mon Audiartz son gais,

Que tota gens ab eslais

Prezon mais lo Comte Ramon

De null autre Comte del mon.

2701, 3794, 7225-6, 7698, M.

Bel m'es qu'ieu cant e condei

Pos l'aur' es douss' e'l temps gais,

E pels vergiers e pels plais

Aug lo retint e'l gabei

Que fan l'auzelet menut

Entre'l blanc e'l vert e'l vaire;

Adonc se deuria traire

Cel que vol qu'amor l'ajut

Vas captenensa de drut.

Ieu no soi drutz mas domnei,

Ni no m sent pena ni fais,

Ni m rancur leu ni m'irais,

Ni per orgolh no m recrei.

Pero temensa m fai mut,

Qu'à la bella de bon aire

Non aus mostrar ni retraire

Mon cor, si'l tenc escondut

Tro qu'aia'l sieu conogut.

Be vol qu'om gen la cortei

E plai li solatz e jais;

E no l'agrad' om savais

Que s'en deguis ni s malmei.

Mas li pros son be vengut,

A cui fai tan bel vejaire

Que quascus es sos lauzaire,

Quan son d'enan lieis mogut,

Meils que s'eran siei vendut.

No crei qu'ab lieis apparei

Beutatz d'autra domna mais, 

Neis flor de rozier quan nais 

Non es plus fresca de liei: 

Cors be fag e gen cregut, 

Boqu'et olhs del mon esclaire, 

Que beutatz noi posc plus faire;

Si mes tota sa vertut

Que res no l'es remazut.

Ses pregar e ses autrei

Son intratz en greu pantais

Com pogues semblar verais

S'ieu sa gran valor desplei;

Qu'enquer non a pretz avut

Domna que nasques de maire,

Qu'encontra'l sieu valgues gaire;

E si n'ai mans car tengut 

Que'l sieu al melhor vencut.

Ja madomna no s malei

S'ieu à sa merce m'eslais,

Que non ai cor que m'abais

Ni ves amor me desrei; 

Qu'ades ai del meils volgut 

Defors e dins mon repaire: 

E de lieis no soi gabaire,

Qu'en plus non ai entendut

Mas gen m'acolh' e m salut.

Canso vai me dir' al rei,

Cui joi guid' e vest e pais,

Qu'anc no l trobei en biais,

Qu'aital com lo volh lo vei.

Ab que cobre Montagut

E Carcasson' e'l repaire,

Pois er de pretz emperaire;

E temeran son escut

Sai Frances e lai Masmut.

Domn' ades m'avetz valgut

Tan que per vos soi cantaire;

E no cugei canso faire

Tro'l fieu vos agues rendut

De Miraval qu'ai perdut.

Mas lo rei m'a covengut

Que lo me rendr' ans de gaire

E mon Audiart Belcaire;

Pois auran domnas e drut

Cobrat lo joi qu'an perdut.

2701, 3794, 7225-6, 7698, M.

Ben aia'l messagiers

E cilh que lo m trames,

A cui rent mil merces

Si ja m torn' alegriers.

Pero de mos mals cossiriers

Qu'ai avutz soi tan sobrepres, 

Qu'à penas crei que domna per amor 

M'aia bon cor ni m volha far honor.

Ab mans adregz mestiers

Avia joi conques

Tals, que cug que m valgues

Si de lai fos entiers.

Que massa rics ni pretz sobriers

No cugera que mi nogues,

Qu'ieu esgardei domna de tal valor

Que de beutatz fos bass'e de ricor.

Tals que ja lauzengiers

No s'en entremezes,

Quar mans enois n'ai pres

Mentr'era drutz leugiers;

Qu'adoncs cujava q'us empiers

No m tengues madomn' en defes,

Per que m tornet mantas vetz à folor

E mantas vetz en gaug et en doussor.

Per so m'era derriers

De totz los autres mes,

Que mon loc no m tolgues

Rotlan ni Oliviers,

Ni ges Orestains ni Augiers

No cujera que s'i mezes:

Mas me ten hom per tan bon cauzidor

Que so qu'ieu volh ten quascus per melhor

Be m cugei fos estiers

Madomna que non es,

Que tostemps li tengues

L'esbaudimens premiers

Sos fols cujars e messongiers,

E cossec la sa mala fes.

De son pauc pretz li fassa dieus menor,

Que mon fin cor a tornat en error.

Qu'ieu fui al prim destriers

Et apres palafres;

Era creis tan l'arnes

Que trop peza'l dobliers.

E pois vei que m'er mal loguiers

E temi que l'afan cregues,

Don no m'aura jamais per servidor;

E lais me dieus mo meils trobar alhor.

Domna que torn' en blasme sa valor

No deu aver de Miraval la tor.

Mon Audiart sal dieus, e sa honor, 

Que totz lo mons val mais per sa valor.

2701, 3794, 7225-6, 7614, C, M.

Entre dos volers soi pensius,

Que'l cor me dis que no cant mais,

Ni amor no vol que m'en lais

Tan quant él segle sia vius. 

Del laissar ai gran razo

Que ja mais no fes canso;

Mas eras cant quar amor e jovens

M'o ensenha, e mezura e sens.

E s'anc nul jorn fui esforsius

D'esser adretz, cortes ni gais,

Era m'es ops que m'i eslais

Ab faitz et ab ditz agradius:

Qu'en tal domn'ai sospeisso

Que'l seu rics, car gazardo

No pot servir nuls hom desavinens,

Quar ilh no fai ni'lh plai res desplazens.

Vas bona domna son autius,

Mas no de re que sos pretz bais;

Equar una domna me trais

Tornar m'en ai vilas mesclius?

Non ja; tenria li pro

Si la tornav' en resso;

Qu'à las avols no ten dan fallimens,

E prezo s mais per gabs e per contens.

Ab aitals honratz senhorius

Ai eu estat tostemps verais,

Qu'afans ni pena ni esglais

Ni nul maltrag no m fos esquius.

Quar tug dizon à lairo

Qu'anc d'amors no fi mon pro

Menton, qu'avut n'ai bes e gauzimens,

E n'ai sufert dans e galiamens.

De cui que s vol baisse sos brius

Plus l'onor midons mont'e nais; 

Qu'aissi com la roza e'l glais

Genson quan repaira l'estius, 

Midons a tot l'an sazo

Qu'ilh sab gensar sa faisso

Ab bels semblans et ab cuendes parvens,

Don creis sos pretz e sos captenemens.

Per lieis am fontainas e rius,

Pratz e vergiers, e boscs e plais,

Las domnas, els pros els savais,

Els fols els savis els badius

De la franca regio

Don ilh es e de viro:

Quar tant es lai assis mos pessamens

Que mais no cug sia terra ni gens.

N'Alazais de Boissazo

Fai son pretz meillor de bo;

E perda dieus qui l'er desavinens,

Pos tan gen sec sos bels comensamens.

2701, 7225-6, 7614, 7698, M.

S'ieu en cantar soven

No m'atur ni m'aten,

Nous cujetz que sabers

M'en falha ni razos,

Ni talans amoros,

Que'l plus de mos volers

Es en joi et en can;

E de razos ai tan,

Que cantar en poiri' assatz:

Mas tot quan sai no volh sapchatz.

Qu'amat ai longamen

Tal domn' ad escien,

Qu'anc servirs ni plazers

No m'i poc esser bos,

Ni pregars ni cansos,

Ni celars ni temers,

Qu'ieu noi trobes engan.

Et ieu sofren mon dan

Saub l'enganar totz enganatz

E remaner ab lieis en patz.

Qu'estiers no m fora gen,

Pos del mieu fallimen

Era vist lo parers,

Qu'ieu encerques son pros,

Entro que d'ambedos

Fos pres eguals lezers,

Que si fes son talan

Ieu m'anei percassan;

E fo plus adretz lo mercatz

Que de liei si m partis iratz.

Drut que de sidons pren

Nul autre venjamen

No sab que s'es jazers;

Que malditz e tensos

Fan d'ensenhat janglos.

E pois non es tot vers

Quan domna fai semblan,

Qu'ilh vol que la deman

Tal que ja no l sera privatz;

E si s'en tenra per pagatz.

Que quant ieu mi prezen

En loc de cauzimen,

Non es mos capteners

Lauzengiers ni ginhos, 

Ans plus temens q'us tos 

Soi lai on es poders. 

E dieus me don l'autr'an 

Trobar domna prezan, 

Que'l gazardos m'en si' onratz 

Quan serai per lieis trebalhatz.

Tot quant es de joven

E de fin pretz valen

Ten la marqueza ders

De Menerb' à sazos; (Menerba)

E per pauc entre nos

No poja sa valors.

Mas en parli dobtan

Qu'enemigas ne blan;

E pois de lieis no m n'escai gratz,

Lo tortz me sia perdonatz.

Mais d'amic, on qu'ieu an

Vos es caps de mon can

E de Miraval poestatz:

Mas no volh que l'anel perdatz.

Uc de Sant Circ. Longamen ai atenduda

N Uc de Sant Circ.

7225, 7614.

N Uc de Sant Circ si fo de Caersi, d'un borc que a nom Tegra. Fils fo d'un paubre vavassor que ac nom n Arman de Saint Circ, per so que'l castels don el fo a nom Saint Circ, qu'es al pe de Sainta Maria de Rocamaior, que fo destruichs per guerra e derrocatz. Aquest n Uc si ac gran ren de fraires majors de se; e volgron lo far clerc e manderon lo à la scola à Monpeslier. E quant eill cuideron que ampares letras, el amparet cansos e vers, e sirventes e tensos e coblas, eill fach eill dich dels valens homes e de las valens domnas que eron al mon ni eron estat: e con aquel sabers s'ajoglari. El coms de Rodes e'l vescoms de Torena si l leverent molt à la joglaria, con las tensos e con las coblas qu'el feiren com lui e'l bons dalfin d'Alvernhe. Et estet lonc temps en Gascoingna paubres, cora à pe cora à caval. Lonc temps estet com la comtessa de Benauges, e per leis gazagnet l'amistat d'en Savaric de Maleon, lo cals lo mes en arnes et en roba. Et estet lonc temps con el en Peitieu et en las encontradas, pois en Cataloingna et en Aragon et en Espaigna, con lo bon rei Amfos e con lo rei Amfos de Leon e con lo rei Peire d'Aragon; e pois en Proensa con totz los barons, pois en Lombardia et en la Marcha. E tolc moiller e fez enfans. Gran ren amparet de l'autrui saber e voluntiers l'enseingnet à autrui. Cansos fes de fort bonas e de bons sons e de bonas coblas; mas no fes gaires de las cansos, quar no fo enamoratz de neguna. Mas se sap feigner enamorat ad ellas ab son bel parlar, e sap ben dire en las soas cansos tot so queill avenia de lor: e ben las sap levar e ben far cazer, quand el lo volia far, ab los sieus vers et ab los sieus digz. Mas pois qu'el ac moiller non fetz cansos.

2701, 7225-6, 7614, C.

Longamen ai atenduda

Una razon avinen

Don fezes canso plazen,

Mas enquer no m'es venguda. 

Donc s'ieu vol de la razo

Qu'en ai far vera canso, 

Ela sera mieg partida 

Canso joioz' e marrida

Lauzan del be qu'ai avut

E plagnen quar l'ai perdut.

Cui dieus vol be cil ajuda:

Qu'à mi volc ben longamen, 

Que m det lo ric joi jauzen

De vos qu'eras ai perduda. 

Ai! dieus, tan plazen mi fo

Lo jois' e tan mi saup bo,

E tant aic avinen vida! 

Mas aoras m'es falhida, 

Que m sent d'aut bas cazegut

E'l cor de tot joi mogut.

De l'onor qu'ai receubuda

Del vostre cors covinen

Ai mon cor trist e dolen;

Quar vei que'l voler vos muda

Qu'aviatz en la sazo;

Quan dieus volia mon pro.

Ai! tan mi dol la partida!

E si l'amors es fenida,

Mal ai vostre cors vezut

E'l be quei es conogut.

Fola domna pens' e cuda

Que leu pren so que dissen,

E per fol nesci parven

Ai vista tal decazuda,

Qu'estava en ric resso

De valor e de faisso.

Quar cela que foudatz guida

Cuja s'esser enrequida,

Quan ve que siei fag menut

Intran en crim et en brut.

E pos domn' es deissenduda

Per blasme de fallimen

Non a mais retenemen, 

Qu'onors de lonh la saluda.

Quar de justa fallizo

Troba greu domna perdo,

Ans li corr quascus e l crida

Et ans que torn' en oblida

Lo crims a tan corregut

Qu'ilh es tornad' en refut.

Domna, sius es irascuda

Vas me, ges nous me defen

Nius me tolh nius vau fugen; 

Qu'anc, pois vos aic conoguda,

Non agui m'entensio

En autra si en vos no.

Quar vos m'es tant abelida 

Que d'autra no volh guerida, 

Ni ses vos no volh m'ajut 

Dieus, ni m don joi ni salut.

Lai on non es conoguda

Dreitura ni fallizo,

Qui va demandar razo? 

E lai on blasmon fallida

Degr' esser onors grazida:

Mas ieu ai tart conogut 

So que m notz ni m'a nogut.

Elias de Barjols. Amor, be m platz e sap bo

Elias de Barjols.

7225.

N Elias de Barjols si fo d'Agenes, d'un castel que a nom Perols. Fils fo d'un mercadier, e cantet meils de negun home que fos en aquella sazon. E fetz se joglars; et acompaingnet se con un autre joglar que avia nom Oliver, et aneron lonc temps per cortz. El coms Anfos de Proensa si los retenc ab se, e det lor moillers à Barjols e terra: e per so los clamavan 

n Elias et Oliver de Barjols. En Elias s'enamoret de la comtessa ma dompna Carsenda, moiller del Comte, quant el fo mortz (a, à) Cesilia, e fes d'elleis suas cansos bellas e bonas tant quant ella visquet. Et el s'en anet rendre al hospital de Saint Beneic d'Avignon; e lai definet.

7698.

Amor, be m platz e sap bo

Quar per vostres faitz vilas,

Mensongiers e soteiras,

Vos mesprendon tug li pro.

Tot per la vostra faillida

Vos fui quascus eus oblida,

E pels fols captenemens

Que faitz tan desavinens.

Amor, ieu vi la sazo

Que vos eratz flors e gras; 

Ar vei que'ls plus sobeiras

En tenon tug mal resso:

Qu'aissius es enmalezida

Vas cels queus an obezida,

Qu'es mensongiers e volvens,

E sirves los dessirvens.

Amor, aissius dic de no, (aissi us)

Qu'ieu no soi en vostras mas. 

Esparvier es de vilas

Qui se met en vostre pro. 

E gart me dieus d'aital vida, 

Que ja no m si'escarida

Qu'ieu vos si' obediens

Ni m torn éls vostres tormens.

Amor, ieu no sai baro,

Tan sia joves efas,

Que mezes dos astezas

Nius servis ses guizardo. (ni us)

Per que cels vos an gequida

Queus an longamen servida; 

Quar meins n'a de jauzimens 

Qui plus vos ser lialmens.

Al valen rei de Leo,

Qu'es senhor de Castelas,

De cui soi amics certas, 

Tramet si l platz ma canso. 

E s'es ben per lui grazida

Meils n'er cantad' et auzida;

Quar el es sobre'ls valens 

La res cortez' e manens.

7226, 7698.

Bels Gazanhs, s'à vos plazia,

Ben fora sazos

Que'l vostre cors bels e bos,

Humils de doussa paria,

Fos d'amor tan cobeitos;

Pos negus non es tan pros

Queus o diga, ni que ja sapcha tan

Que vos o aus dir ni que vos o man.

Qu'ieu sai qu'à vos tanheria

Amics cabalos,

Tals don res à dir no fos,

Aitals com ieu cauziria.

Farai n'un tot nou qu'er bos;

E penrai de las faissos

De cada un, de las melhors qu'auran, 

Tro vos aiatz cavalier ben estan.

Aimars mi don sa coindia;

En Trencaleos

Sa genseza; en Randos

Donar, qu'es sa senhoria;

E'l Dalfis sos bels respos;

En Peir cui es Monleos

Do m son gabar; e volrai d'en Brian

Cavalleri'; e'l sen volh d'en Bertran.

Bels Castellas, cortezia

Volh aver de vos;

E volrai que m do n Eblos

Covit, que plus non penria;

En Miraval sas cansos:

En Pos de Capduelh do nos

Sa gaieza; en Bertran la Tor man

Sa drecheza mi don e no m soan.

Aital l'auretz ses fadia

Gai et amoros,

Bel e ben fait e joios,

E ples de cavalairia.

Et es ben dreitz e razos

Que vos l'ametz et el vos;

Qu'assatz seretz ambedui d'un semblan,

Sol no crezatz fals lauzengier truan.

Note. L'idée de cette pièce est la même que celle de la domna Soicebuda de Bertrand de Born.

Folquet de Marselha. Huei mais noi conosc razo

Folquet de Marselha.

Florissait en 1180. Hist. génér. de Provence. T. 2, p. 393.

2701, 7225.

Folquet de Marselha fo filh d'un mercadier de Genoa, que ac nom sier n Anfos. E can lo paire mori, el lo layssec ric d'aver. E el entendet en pretz, e mes se à servir valens homes, e à trevar ab lor et anar e venir. E fon fort grazit per lo rey Richart, e per lo bon coms R. de Toloza, e per en Barral lo sieu senhor de Marselha. E trobet mot be: e fo avinens de la persona. E entendia se en la molher de son senhor en Barral, e pregava la; e d'ela fazia sas cansos. E anc per re qu'el fezes non li volc far plazer d'amor, per que tostems se plays en sas cansos.

Can lo bon rey Anfos de Castela fo estatz descofitz per lo rey de Marroc, lo qual era apelatz Miramamoli, e li ac touta Calatrava e Salvaterra, e'l castel de Toninas, fon grans dols per tota Espanha, e per totz cels que o auziro, per so car crestiantat era tan descofida; e car lo bon rey era estatz descofitz, e avia mot perduda de sa terra: e soven intravan las gens del Miramamoli en las terras del rei'n Anfos (rei n'Anfos), e i fazian gran dan. Lo bo rei Anfos mandet sos messatges al Papa, qu'el degues far socorre als baros de Fransa e d'Englaterra, e al rei d'Arago, e al comte de Toloza. En Folquetz era amic del rei de Castela, e no s'era encaras rendutz en l'orde de Cistel; si fes una prezicansa per confortar los baros que deguesso socorre al rei de Castela, mostran la honor que seria'l secors e'l perdo que n'aurian; e comensa aysi:

Huei mais noi conosc razo.

Folquet, si com avetz auzit, amava la molher de son senhor en Barral, madona na Alazaitz de Roca Martina, e d'ela fazia sas cansos. E gardava se fort c'om non o saubes, car era molher de son senhor. La dona li sufria sos precs e sas cansos, per la gran lauzor qu'el fazia d'ela. 

En Barral si avia doas serors de gran valor e de gran beutat; l'una avia nom na Laura de San Jorlan, l'autra na Mabilia de Ponteves: abdos estavo ab en Barral. En Folquet avia tanta d'amistat ab cascuna, que semblans era que en cascuna se entendes per amor. E madomna n'Alazais crezia que entendes en madona Laura e que l volgues be. E si l'acuzet ela e'l fetz acuzar à motz homes, si qu'ela li det comiat, que no volia plus sos precs ni sos ditz; e que se partis de na Laura; e que de leis non esperes mais be ni amor.

Folquet fo mot dolens can sa dona l'ac donat comiat, e layset solas e chan e rire. E estet gran sazo en marrimen, planhen la desaventura que l'era venguda; car perdia sa dona qu'el amava mays que re, per lieis à qui el no volia be mas per cortezia. E sobre aquel marrimen el anet vezer l'enperayritz, molher d'en G. de Monpeslier, que fo filha al enperador Manuel, que fo caps e guitz de tota valor e de tot be, e clamet se ad ela de la desaventura que l'era avenguda. E ela lo cofortet tan can poc, e'l preguec que no s marris ni desesperes; e que per la sua amor chantes e fezes chansos. Don el per lo sieu prec fetz aquesta que ditz:

Tan mou de corteza razo.

E avenc se que madona n'Alazais muri, en Barral sos maritz e senher de luy muri; e muri lo bon rey Richart, e'l bon coms de Toloza, e'l rey 'n Anfos d'Arago; don el per tristeza de sa dona e dels baros qu'ero mortz, abandonec lo mon; e rendec se en l'orde de Cistel, ab sa molher et ab dos fils que avia. E fon fatz abas d'una rica abadia qu'es en Proensa, que a nom lo Torondet; e pueis fon fatz avesques de Toloza, e lai definet.

2701, 7225-6, 7614, 7698, M.

Huei mais noi conosc razo

Ab que nos poscam cobrir,

Si ja dius volem servir,

Pos tant enquer nostre pro

Que son dan en volc sufrir;

Que'l sepulcre perdem primeiramen, 

Et ar sufre qu'Espanha s vai perden,

Par so quar lai trobavon ocaizo;

Mas sai sivals no temem mar ni ven. 

Las! quom nos pot plus fort aver somos

Si doncs no fos tornatz morir per nos!

De si mezeis nos fes do

Quan venc nostres tortz delir;

E fes so sai à grazir

Quan si ns det per rezemso.

Doncs qui vol viur' ab morir

Si don per diu sa vida e la i prezen,

Qu'el la donet e la rendet moren,

Qu'atressi deu hom morir no sab quo.

Ai! com mal viu qui non a espaven!

Que'l nostre viure, don em cobeitos,

Sabem qu'es mals et aquel morir bos.

Aujatz en qual error so

Las gens ni que poiran dir,

Que'l cors qu'om no pot gandir

De mort, per aver quei do,

Vol quecs gardar e blandir;

E de l'arma non a nul espaven

Qu'om pot gardar de mort e de tormen.

Pens quecs de cor si eu dic ver o no,

E pois aura d'anar meillor talen:

E ja noi gart paubreira nuls hom pros,

Sol que comens, que dius es piatos.

Cor sivals pot n'aver bo,

D'aitans poira s'en garnir,

Que l'als pot dieus totz complir

E nostre rei d'Arago;

Qu'ieu no cre saubes fallir

A nul quei an ab bon cor e valen,

Tan pauc vezem que falh à l'autra gen.

No deu ges far à dieu pejurazo,

Que l'onrara si l serv onradamen;

Qu'ogan si s vol n'er coronatz sà jos

O sus él cel; uns no l falh d'aquest dos.

E ja no pretz fol resso

Lo reis castelas, ni s vir

Per perdre, q'ans deu grazir

A dius que l mostr' e'l somo

Qu'en lui se vol enantir

Et autr'esfortz ses diu torn'à nien:

Qu'aissi valrà son ric pretz per un cen

Si acoill dius hoimais per companho,

Qu'el no vol re mas reconoissemen.

Sol que vas dius no sia orgolhos,

Mout er sos pretz onratz e cabalos.

Vida e pretz, com vol de folla gen, 

On plus aut son cazon leugeiramen.

Bastiscam doncs en ferma peazo, 

El pretz qu'este quan l'autre va cazen; 

Que totz sos pretz, sos gaugz e sos laus fos 

En pessar fort quant dius à fait per nos.

Bels Azimans, dius vezem queus aten, 

Queus volria gazanhar francamen, 

Qu'onrat vos te tan quez à mi sap bo. 

No l fassatz donc camiar son bon talen, 

Ans camiatz vos: que val mais per un dos 

Com fos tan aut que forsatz caia jos.

2701, 3794, 7225-6, 7614, 7698, C, M.

Tan mou de corteza razo

Mon cant per que noi deu falhir,

Ans i dei meils endevenir

Qu'anc mais no fis; e direus co,

Que l'emperairitz m'en somo.

E plagra m fort que m'en gequis,

S'ilh m'o sufris:

Mas quar ilh es cim e razis

D'ensenhamen,

No s cove qu'al sieu mandamen

Sia mos sabers flacs ni lens,

Ans taing que s doble mos engiens.

E s'anc parlei en ma canso

De lauzengier, cui dieus azir,

Eras los volh del tot maldir.

E ja dius noca lor perdo,

Quar an dig, so que vers no fo,

Que'l bella cui ieu obedis

Me relinquis;

E cuja qu'alhors ai assis

Mon pessamen.

Be mor doncs per gran fallimen,

Si pert so qu'ieu am finamens

Per so que dizo, qu'es niens.

Mas ges per so no m'abando;

Que mantas vetz ai auzit dir

Que messonja no s pot cobrir

Que no s mostre qualque sazo.

E pois dretz vens fals'ocaizo.

Encar er saubut e devis

Com ieu'l soi fis;

Qu'aissi l soi subjetz et aclis

De bon talen,

Qu'en leis amar an pres conten

Mos ferm coratges e mos sens,

Q'usquecs cuj'amar plus formens.

E si merces no m'i ten pro,

Que farai? poirai m'en partir?

Ieu, no; qu'apres ai à morir

En guiza que m sap sobre bo,

Qu'en pessan remir sa faisso

Et en remiran ieu languis;

Quar ela m dis

Que no m dara so qu'ieu l'ai quis

Tan longamen:

E ges per aisso no m'alen,

Ans d'obl' ades mos pessamens;

E mor aissi mescladamens.

Amarai la doncs à lairo,

Pos vei que no denha sufrir

Qu'ieu ins é mon cor la desir.

E sai qu'à far m'er, voill' o no;

Que'l cors ten lo cor en preizo,

Et a'l si vencut e conquis 

Que no m'es vis

Qu'ilh des poder que s'en partis;

Per qu'ieu n'aten

Que merces la m venca breumen: 

Quar long servirs ab merces vens, 

Lai on no val forsa ni genhs.

N Aziman, mout m'estera gen 

S'ieu mor per midons doussamens, 

Pos qu'à morir m'er eissamens.