Peire Raimon de Toulouse.
Atressi cum la candela
que si meteissa destrui,
per far clartat ad autrui,
chant, on plus trac greu martire,
per plazer de l'autra gen.
E car a dreit escien
sai qu'eu fatz folatge,
c'ad autrui don alegratge
et a mi pen' e tormen.
Nuilla res, si mal m'en pren,
no m deu plaigner del dampnatge,
Car ben conosc per uzatge
que lai, on amors s'aten,
val foudatz en loc de sen.
Doncs pos tant am e dezire
la gensor qu'el mon se mir,
per mal que m deia venir
no s taing que m recreia;
car on plus m'auci d'enveia,
plus li dei ma mort grazir,
si l dreit d'amor voill seguir,
qu'estiers sa cortz non plaideia.
Doncs pos aisso que m guerreia
conosc que m'er a blandir,
ab honrar et ab sofrir
li serai hom e servire;
e s'aissi m vol retener,
vec me tot al seu plazer,
fin, franc, ses bauzia!
E s'ab aital tricharia
posc en sa cort remaner,
el mon non a nuill saber
per qu'eu camjes ma folia.
Lo jorn que sa cortezia
mi mostret e m fetz parer
ab un amoros plazer
que m fetz, me cuiet aucire;
qu'ins el cor m'anet sazir
e'l cor mi mes un dezir
que m'auci d'enveia;
et eu cum fols que foleia
fui leus ad enfoletir,
car cuiei so per albir
qu'eu eis no m pens qu'esser deia.
Si per nuill' autra que seia
mi pogues plus enriquir,
be m n'agra cor a partir;
mas com plus fort m'o consire,
en tant quant lo mons perpren,
non sai una tant valen
de negun paratge;
per qu'eu el seu seignoratge
remaing tot vencudamen,
pos non trob meilluramen
per fors' o per agradatge.
Chansos, al port d'alegratge,
on pretz e valors s'aten,
al rei que sap et enten,
m'iras en Aragon dire
c'anc mais tant jauzens non fui
per fin' amor cum er sui;
c'ab rems et ab vela
poi' ades so que no s cela:
e per so non fatz gran brui
ni voill c'om sapcha de cui
m'o dic, plus que d'un' estela.
Mas vos am, ges una mela
no m pretz, car ab vos non sui.
Pero als ops vos estui
que m siatz governs e vela.
