7225, 7614.
Lo Dalfins d'Alverne si fo coms d'Alverne, uns dels plus savis cavalliers et dels plus cortes del mon, e dels larcs; e'l meiller d'armas, e que plus saup d'amor e de domnei, e de guerra, e de totz faitz avinens; e'l plus conoissens e'l plus entendens, que meils trobet sirventes, coblas e tensos; e'l plus gen parlans hom que anc fos à sen et à solatz. E per larguesa soa perdet la meitat et plus de tot lo sieu comtat; e per avareza e per sen o sab tot recobrar, e gazaignar plus que non perdet.
2701, 7225, 7614.
Reis, pois que de mi cantatz,
Trobat avetz cantador:
Mas tan me faitz de paor,
Per que torn à vos forsatz,
E plazentiers vos en son.
Mas d'aitan vos ocaison,
S' oimais laissatz vostres fieus
No m mandetz querre los mieus.
Qu'eu no soi reis coronatz,
Ni hom de tan gran ricor
Que posc' à mon fort seignor
Defendre mas heretatz.
Mas vos, cui li Turc felon
Temion mais q'un leon,
Reis e ducs, e coms d'Angieus:
Sufretz que Gisors es sieus.
Anc no fui vostre juratz
E conoissi ma folor:
Que tan caval mil soudor
E tans esterlins pesatz
Donetz mon cosin Guion,
So dison siei compagnon
Tostemps segran vostr'estrieus,
Sol tan larc vos tenga dieus.
Ben par, quan me mandavatz
Qu'eu soli' aver valor,
Que m laissassetz sordejor,
Pois que bon me laissavatz,
Pero dieus m'a fag tan pron,
Qu'entre'l Puoi et Albusson
Posc remaner entre'ls mieus:
Qu'ieu no son sers ni Judieus.
Seigner valens et honratz,
Que m'avetz donat aillor,
Si no sembles camiador
Ves vos m'en fora tornatz.
Mas nostre reis de saison
Rend Usoir' e lais' Usson;
E'l cobrar es me mot lieus,
Qu'ieu n'ai sai agut sos brieus.
Qu'eu soi mout entalentatz
De vos e de vostr'amor;
Que'l coms, queus fetz tan d'onor
D'Engolmes n'es gen pagatz:
Que Tolueir'en la maison,
A guisa de larc baron,
Li donetz, q'anc non fotz grieus,
So m'a comtat un romieus.
Reis, hoimais me veiretz pron,
Que tals domna m'en somon
Cui soi tan finament sieus
Que totz sos comans m'es lieus.
