12. Bernardo di Ventadorn. *
Quan vei la laudeta mover
de joi sas alas contral rai,
que s' oblid' es laissa cazer
per la doussor qu'al cor li vai,
ailas, quals enveja m'en ve
de cui qu'eu veja jauzion!
meravilhas ai, quar desse
lo cors de dezirier nom fon.
Ailas, tan cujava saber
d'amor, e tan petit en sai!
quar eu d'amar nom posc tener
celleis don ja pro non aurai;
tout m'a mon cor e tout m'a se
e mi mezeis e tot lo mon;
e quan sim tolc, nom laisset re
mas dezirier e cor volon.
Anc non agui de mi poder
ni no fui meus deslor en sai,
quem laisset en sos olhs vezer
en un miralh que mout mi plai.
miralhs, pos me mirei en te,
m'an mort li sospir de preon;
qu'aissim perdei cum perdet se
lo bels Narcisus en la fon.
De las domnas mi dezesper,
jamais en lor nom fiarai,
qu'aissi cum las solh captener,
enaissi los descaptenrai:
pos vei que nulha pro nom te
ves leis quem destrui em cofon,
totas las dopt e las mescre,
que ben sai qu'atretals se son.
D'aissos fai ben femna parer
ma domna, per qu'eu l'o retrai,
quar vol so qu'om no deu voler,
e so qu'om li deveda fai.
cazutz sui en mala merce
et ai ben fait cum fols en pon,
e no sai per que m'esdeve,
mas quar trop pogei contra mon.
Merces es perduda per ver,
et eu non o saubi ancmai,
quar cil que plus en degr' aver
non a ges, et on la querrai?
a, quan mal sembla, qui la ve,
que aquest caitiu deziron,
que ja ses leis non aura be,
laisse morir que no l'aon.
Pos ab mi dons nom pot valer
precs ni merces nil dreitz qu'eu ai,
ni a leis no ven a plazer
qu'eu l'am, jamais no loi dirai.
aissim part de leis em recre:
mort m'a e per mort li respon,
e vau m'en, pos ilh nom rete,
faiditz en eissilh, no sai on.
Tristans, ges non auretz de me,
qu'eu m'en vau caitius, no sai on:
de chantar me gic em recre,
e de joi e d'amor m'escon.
* Biografia, secondo il testo edito dallo Chabaneau (op. cit. p. 11): Bernartz de Ventador si fo de Lemosin, del chastel de Ventador, de paubra generation, fils d'un sirven e d'una fornyeira, si con dis Peire d'Alvergne... mas de qui qu'el fos fils, Dieus li det bella persona & avinen, e gentil cor, don fo el comensamen gentilessa; e det li sen e saber e cortesia e gen parlar; & avia sotilessa & art de trobar bos motz e gais sons. et enamoret se de la vescomtessa de Ventador, moiller de son seignor. e Dieus li det tant de venturas per son bel captenement e per son gai trobar, qu'ella li volc ben outra mesura, que noi gardet sen ni gentilessa ni honor ni valor ni blasme, mas fugi son sen e seguet sa voluntat, si con dis n' Arnautz de Maruoill... mout duret lor amors longa sason enans quel vescoms s'en aperceubes. e quan s'en fo aperceubutz, mout fo dolens e tritz, e mes la vescomtessa soa moillier en gran tristessa & en gran dolor, e fez dar cumjat a Bernart de Ventador, qu'el issis de la sua encontrada. et el s'en issi e s'en anet en Normandia, a la dukessa, qu'era adonc domna dels Normans, & era joves e gaia e de gran valor... et ella lo receub con gran plaser e con grant honor, e fo mout alegra de la soa venguda e fetz lo seignor e maistre de tota la soa cort. et en aissi con el s'enamoret de la moillier de so seignor, en aissi s'enamoret de la duchessa, & ella de lui. lonc temps ac gran joia d'ella e gran benanansa, entro qu'ella tolc lo rei Enric d'Anglaterra per marit, e que lan mena outra lo bras de mar d'Angleterra, si qu'el no la vi mai ni so mesage; don el puois, de duol e de tristessa que ac de lei, si se fetz monges en l'abadia de Dalon & aqui persevera tro a la fin.
