Uc de Saint-Circ.
I.
Tres enemics e dos mals senhors ai,
qu'usquecs ponha noit e jorn cum m'aucia:
l'enemic son mei olh e l cors qui m fai
voler celei qu'a mi non tanheria;
e l'us senher es amors qu'en bailia
ten mon fin cor e mon fin pensamen,
l'autre etz vos, domna, en cui m'enten,
a cui non aus mon cor mostrar ni dir
cum m'aucizetz d'envei' e de dezir.
Que farai eu, domna, que sai ni lai
non posc trobar ren ses vos que m bon sia? (bon me sia)
Que farai eu, cui serion esglai
tuit autre joi, si de vos no ls avia?
Que farai eu, cui capdella e guia
la vostr' amors, e m fug e m sec e m pren?
Que farai eu, qu'autre joi non aten?
Que farai eu ni cum poirai gandir,
si vos, domna, no m voletz retenir?
Cum durarai eu que non posc morir,
ni ma vida no m'es mas malenansa?
Cum durarai eu cui vos faitz languir,
dezesperat ab un pauc d'esperansa?
Cum durarai eu que ja alegransa
non aurai mais si no m'en ven de vos?
Cum durarai, domna, qu'eu sui gilos
de tot home qui vai vas vos e ve,
e de totz cels a cui n'aug dire be?
Cum viurai eu que tan coral sospir
fatz noit e jorn, que movon d'esperansa?
Cum viurai eu, que non posc far ni dir
autra ses vos ren que m tenh' ad onransa?
Cum viurai eu qu'als no port en membransa
mas vostre cors e sas plazens faissos
e ls cortes ditz humils et amoros?
Cum viurai eu que d'als non prec de me
Deu, mas que m lais ab vos trobar merce?
Que dirai eu, domna, si no m mante
fina merces, sivals d'aitan qu'eu vensa
ab mon fin cor et ab ma leial fe
vostra rictat e vostra gran valensa?
Que dirai eu, si vos no m faitz sufrensa?
Que dirai eu, c'autra non posc vezer
qu'en dreit d'amor mi posc' al cor plazer?
Que dirai eu, qu'autra el mon non es
que m dones joi per nulh be que m fezes.
A la valen comtessa de Proensa,
quar son sei fait d'onor e de saber,
e lh dig cortes e lh semblan de plazer,
an ma chansos, car cella de cui es
mi comandet qu'a leis la trameses.
II.
N'Uc de sain Circ e l coms de Rodes.
“Seign'en coms, no us cal esmaiar
per mi ni estar consiros,
qu'eu no sui ges vengutz a vos
per ren querre ni demandar;
que ben ai so que m'a mestier,
e vos vei que faillon denier,
per qu'eu non ai en cor que us queira re,
ans, si us dava, faria gran merce.”
"N'Uc de Sain Circ, be m deu grevar
que us veia que ogan sai fos
paubres e nutz e sofraitos,
et eu vo n fi manen anar,
que mai m costetz que dui archier
non feiron o dui cavallier:
pero ben sai, si us dav' un palafre,
Deus que m'en gart, vos lo penriatz be.”
