VII, Era nos sia guitz Lo vers dieus Iheus Critz,

VII.

Era nos sia guitz

Lo vers dieus Iheus Critz,

Quar de franqua gen guaya

Sui per lui partitz,

On ai estat noiritz

Et honratz e grazitz;

Per so 'l prec no 'l desplaya,

S' ieu m' en part marritz.

Ai! gentils Lemozis,

El vostre dous pays

Lais, de belha paria,

Senhors e vezis

E domnas ab pretz fis,

Flors de gran cortezia;

Don plang e languis,

E sospir nueg e dia.

E quals que sia 'l critz 

Del remaner auzitz,

Ja negus bes qu' ieu aya,

Ni rics luecs aizitz

No m tenra, ni conquitz,

S' avia 'ls votz complitz,

Qu' apres calenda maya

No sia guarnitz

Del torn, si dieus l' aizitz;

E s' a lui plaz ma fis

En leyal romania,

Lo tot li grazis;

Pero mas juns, aclis,

Soplei sa senhoria

Qu' els portz e 'ls camis

Nos endres vas Suria.

Honratz es e grazitz

Cui 'n dieu non es falhitz;

Que dieus vol et assaya

Los pros e 'ls arditz,

Et aquels a chauzitz;

E laissa los aunitz

E l' avol gen savaya

Per cui es traitz.

Ai! caitiu mal assis,

Cum vos etz tuit aucis!

C' avers e manentia

Vos tol paradis,

Qu' avar etz e ressis

Tan q' us far no poria

Qu' a dieu abellis,

Per que dieus vos desfia.

Hueimais es Antecritz

Al dan del mon issitz,

Que tot lo bes s' esmaya,

E 'l mals es salhitz,

Qu' els fals prins a sazitz

E pres, et endormitz

El peccat, qu' els esglaya

E 'ls ten morns e tritz;

Qu' el reys cui es Paris

Vol mais a sant Daunis,

O lai en Normandia,

Conquerr' esterlis,

Que tot quan Safadis

A ni ten en baillia,

Don pot esser fis

Qu' aissi cum deura sia.

Ar laissem los giquitz

Remazutz, escarnitz,

Et ab obra veraya

De bona razitz

Sia per nos servitz

Lo vers sans Esperitz,

Cui preguem que ns atraya,

Ab faitz afortitz,

Al dan dels Sarrazis,

Si qu' en sia conquis

Lo sans luecs, e la via

Faita als peleris

Que nos tolc Saladis;

Don la verges Maria,

Cui dieus benezis, 

Nos sia guerentia.

Ai! dos miracles fis!

Vos e 'l pros Peitavis

Sal dieus e benezia,

Car lui sui aclis,

Et a nos peleris

Lais venir en Suria,

Qu' el coms Baudonis

E 'l pros marques y sia.

Gaucelm Faidit.

VI. Ara sai eu de pretz quals l' a plus gran

VI.

Ara sai eu de pretz quals l' a plus gran 

De totz aquels que s leveiron mati; 

Seigner Conratz l' a plus fin ses enjan 

Que s defen lai a Sur d' En Saladi

E de sa mainada croia;

Secora 'l dieus, qu' el socors vai tarzan;

Sols aura 'l pretz, que sols sofre l' afan.

Seigner Conrat, a Jesu vos coman,

Qu' eu fora lai ab vos, so vos affi,

Mas lassei m' en, quar se tarzaven tan

Li comt e ill duc e ill rei e li princi,

Pois vi mi dons bell' e bloia,

Per que s' anet mos cors afreollan,

Qu' eu fora lai, ben a passat un an.

Seigner Conrat, eu sai dui rei qu' estan

D' ajudar vos, ara entendatz qui,

Lo reis Felips es l' uns, quar va doptan;

Lo reis Richart es l' autr', e dopt aissi;

Ar fos uns quecs d' els en bonia

D' En Saladin, pos van de deu gaban,

Quar son crozat e d' anar mot no fan.

Seigner Conrat, tot per vostr' amor chan, 

Ni ges no i gart ami ni enemi,

Mas per so 'l fatz que ill crozat vau reptan

Del passatge qu' an si mes en obli;

Non cuidon qu' a dieu enoia

Que ill se paisson e se van sojornan,

E us enduratz fam, set, et ill stan.

Seigner Conrat, la roda s vai viran

En aquest mon pur en mal a la fi,

Quar paucs en sai que no s' anon penan

Com enganon vezi e non vezi;

Mas cel que pert no ill par joia;

Doncs sapchan ben, cill qu' ieu dic qu' aiso fan, 

Que dieus escriu so que dig e faig an.

Seigner Conrat, lo rei Richart val tan,

Sitot quan voill de lui gran mal m' en di,

Qu' el passera ab tal esfort ogan

Com far poira, so aug dir tot de fi,

E 'l reis Felips en mar poia

Ab autres reis c' ab tal esfort vendran

Que part l' albre sec irem conquistan.

Bel Papiol, vas Savoia

Ten ton camin e vas branditz brochan, 

E passa 'l mar, c' al rei Conrat ti man.

Quan seras lai no t' enoia,

Tu li diras que s' ar no ill vaill ab bran,

Ill valrai tost, si 'ls reis no m van bausan.

Mas ben es vers qu' a tal domna m coman,

S' el passatge no ill platz, non crei que i an.

Bertrand de Born.