XV, Digatz, Bertrans de San Felitz,

XV.

Digatz, Bertrans de San Felitz,
Laqual tenriatz per meillor
D' una domna de gran valor
Franca, cortesa, ab bel semblan,
Qu' anc non amet per nom de drudaria,
Ni ren non sap d' engan ni de bauzia?
Era chauzetz que vos l' anetz preian
O qu' ela us prec, e que us am atretan.

N Ugo, gen fazetz jocs partitz,
Si trobassetz bon chauzidor;
Mas ieu non farai tan d' onor,
Car vei que partetz ses engan.
Vos que avetz de preiar maestria,
Voill que preietz, car foudatz semblaria
Qu' ieu soanes tan ric don ni tan gran,
Si be m conosc qu' el grazirs a afan.

Bertrans, ges aissi non chauzitz
A guiza de fin amador;
Que, segon jutjamen d' amor,
Val mais quan la prec merceian.
Precs de domna no dura mas un dia,
E si dura, non par que de ver sia;
E precs d' amic esforsa e vai enan,
E 'l sieus reman, per que non val ges tan.

N Ugo, ges ieu non esconditz
Qu' el preiars non aia sabor,
Mas mais prez om bon donador
Quan, ses querre, trai don avan;
E no us cuidetz que fassa leujaria
Domna, s' enquier amic ses tricharia,
Ni 'n vol aver un fin a son coman,
Que maint pregon que son fals e truan.

Bertrans, jois quant es conquezitz
Ab gran maltrag et ab dolor
Val mais, mas vos avetz paor
Que il prec nous tenguesson mas dan;
Cent tans prez mais, s' ieu ad honor vencia,
Que si preses so que vencutz seria;
E pois non es a domna benestan,
S' il fai aisso que las meillors non fan.

N Ugo, lo mieus jois es complitz
Ses temer de lausenjador,
E vos remanetz en error,
Qu' ieu teing e vos anatz musan;
So qu' ieu voill ai, et ill so que volia;
Doncs sui ben fols, s' al segle plus queria,
Qu' anc non anet miels a nuill fin aman,
Qu' ieu posc rire quan l' autre van ploran.

Bertrans, totz temps conosc que duraria
Nostra tensos, per qu' ieu voill qu' el plaitz sia
En ma domna Na Ticborc on estan
Pretz e valors, quan l' autre van baissan.

N Ugo, ges ieu d' aisso no us dediria,
Que ma domna Na Ticborcs tals non sia;
Mas la comtessa ab tot faich benestan
Voill que i sia, que miels s' acordaran.

            Hugues de la Bachélerie et Bertrand de Saint-Félix.

XIV, Gui d' Uiselh, be m peza de vos,

XIV.

Gui d' Uiselh, be m peza de vos,

Quar vos etz laissatz de chantar,

E quar vos i volgra tornar:

Per que sabetz d' aitals razos,

Voill que m digatz si deu far engualmen 

Domna per drut, quan lo quier francamen, 

Com el per lieys tot quan tanh ad amor, 

Segon lo dreg que tenon l' amador.

Domna, Na Maria, tensos

E tot chant cuiava laissar;

Mas aoras non aus mudar

Qu' ieu no chant al vostre somos:

E respon vos de la domna breumen,

Que per son drut deu far comunalmen,

Com el per lieys, ses garda de ricor;

Qu' en dos amics non deu aver maior.

Gui, tot so don es cobeitos

Deu drutz ab merce demandar;

E domna deu l' o autreiar,

Mas ben deu esguardar sazos;

E 'l drutz deu far precx e comandamen,

Com per amigua e per domn' eissamen;

E domna deu a son drut far honor,

Com ad amic e no com a senhor.

Domna, sai dizen entre nos

Que, lai on domna vol amar,

Engualmen deu son drut honrar,

Quant engualmen son amoros:

E s' esdeve qu' ill l' am plus finamen,

Li dig e ill fag o devon far parven;

E s' a ves lieys fals cor ni trichador,

Ab bel semblan deu cobrir sa dolor.

Gui d' Uiselh, ges d' aitals razos

No son li drut al comensar;

Ans ditz cascus, quan vol preiar,

Mas junthas e de genolhos:

Domna, vulhatz que us serva humilmen

Com lo vostr' om; e s' ella enaissi 'l pren,

Ieu lo jutge per dreg a traydor,

Si s fai pariers e s det per servidor.

Domna, ben es plaitz vergonhos

Ad ops de domna razonar,

Que no tenha celui per par

Cui aura fag un cor de dos.

O vos diretz, e no us estara gen,

Qu' el drutz la deu amar plus leialmen;

O vos diretz qu' ill son par entre lor,

Que re no ill deu lo drutz mas per amor.

Gui d' Uisel et Marie de Ventadour.