Guilhem Figueira. D'un sirventes far en est son que m'agenssa (Roma)

Guilhem Figueira.

D'un sirventes far en est son que m'agenssa (agensa)

no m vuolh plus tarzar ni far longa bistenssa, (bistensa)

e sai ses doptar qu'ieu n'aurai malvolenssa, (malvolensa)

car fauc sirventes

dels fals, d'enjan ples

de Roma, que es caps de la dechasenssa, (dechasensa)

on dechai totz bes.

No m meravilh ges, Roma, si la gens erra,

que l segl' avetz mes en trebalh et en guerra,

e pretz e merces mor per vos e s sosterra,

Rom' enganairitz,

qu'etz de totz mals guitz

e cim' e razitz, que l bons reis d'Englaterra

fon per vos trahitz.

Roma trichairitz, cobeitatz vos engana,

qu'a vostras berbitz tondetz trop de la lana. 

Lo Sains Esperitz, que receup carn  humana

entenda mos precs

e franha tos becs.

Roma, no m'entrecs, cum es fals' e trafana

vas nos e vas Grecs.

Rom', als homes pecs rozetz la carn e l'ossa, (los ossos)

e guidatz los cecs ab vos inz en la fossa,

e passatz los decs de Deu, car trop es grossa

vostra cobeitatz,

car vos perdonatz

per deniers pechatz. Roma, de gran trasdossa,

de mal vos cargatz.

Roma, ben sapchatz que vostr' avols barata

e vostra foudatz fetz perdre Damiata.

Malamen renhatz, Roma! Dieus vos abata

en dechazemen,

car trop falsamen

renhatz per argen, Roma de mal' esclata,

e de mal coven.

Roma, veramen sai ieu senes doptanssa (doptansa)

qu'ab galiamen de falsa perdonansa

liuratz a turmen lo barnatge de Franssa (Fransa)

lonh de paradis, 

e l bon rei Lois,

Rom', avetz aucis, c'ab falsa predicanssa (predicansa)

l traissetz de Paris.

Rom', als Sarrazis fasetz pauc de  dampnatge

mas Grecs e Latis metetz e carnalatge.

Inz el foc d'abis, Roma, faitz vostr' estatge

en perdicion.

Ja Dieus part no m don,

Roma, del perdon ni del pelegrinatge

que fetz d'Avinhon.

Roma, ses razon avetz mainta gen morta,

e jes no m sab bon, car tenetz via torta,

qu'a salvacion, Roma, serratz la porta:

per qu'a mal govern

qui sec vostr' estern

d'estiu e d'invern, car diables l'en porta

inz el fuoc d'enfern.

Roma, be s decern lo mals c'om vos deu dire,

quar faitz per esquern dels crestians martire:

mas en cal quadern trobatz qu'om dei' aucire,

Roma ls crestians?

Dieus, qu'es verais pans

e cotidians, mi don so qu'ieu dezire

vezer dels Romans.

Roma, vers es plans que tro foz angoissosa

dels perdons trafans que fetz sobre Tolosa.

Trop rozetz las mans a lei de rabiosa,

Roma descordans!

Mas si l coms prezans

viu ancar dos ans, Fransa n'er dolorosa,

dels vostres engans.

Roma, tant es grans la vostra forfaitura,

que Dieu e sos sans en gitatz a noncura,

tant etz mal renhans, Roma fals' e tafura:

per qu'en vos s'escon

e s magr', e s cofon

lo jois d'aquest mon. E faitz gran desmezura

del comte Raimon.

Roma! Dieus l'aon e lh don poder e forsa,

al comte, que ton los Frances e ls escorsa

e fa'n planca e pon quand ab els se comorsa;

et a mi platz fort.

Rom', a Dieu recort

del vostre gran tort, si l platz, e l comt' estorsa

de vos e de mort.

Roma, be m conort quez en abans de gaire

venretz a mal port, si l'adreitz emperaire

men' adrech sa sort ni fai so que deu faire,

Roma, eu dic ver

que l vostre poder

veirem dechazer. Roma, lo vers salvaire

m'o lais tost vezer!

Roma, per aver faitz mainta vilania

e maint desplazer e mainta fellonia,

tant voletz aver del mon la senhoria

que ren non temetz

Dieu ni sos devetz;

anz vei que fazetz mais qu'ieu dir non poiria

de mal, per un detz.

Roma, tan tenetz estreg la vostra grapa

que so que podetz tener, greu vos escapa.

Si'n breu non perdetz poder, a mala trapa

es lo mons cazutz

e mortz e vencutz e l pretz confondutz.

Roma, la vostra papa

fai aitals vertutz.

Roma, cel qu'es lutz del mon e vera vida

e vera salutz, vos don mal' escarida;

car tans mals saubutz fasetz, don lo mons crida.

Roma desleials,

razitz de totz mals,

els focs enfernals ardretz senes faillida,

si non penssatz d'als. (pensatz; si no pensáu en atra cosa)

Rom', als cardenals vos pot hom sobreprendre

per los criminals pecatz que fan entendre,

que non pensan d'als mas cum puoscan revendre

Dieu e sos amics,

e no i val castics.

Roma, grans fastics es d'auzir e d'entendre

los vostres prezics.

Rom', ieu sui enics, car vostre poders monta

e car grans destrics ab vos totz nos afronta,

car vos etz abrics e caps d'engan e d'onta

e de deshonor;

e il vostre pastor

son fals trichador, Roma, e qui ls aconta

fai trop gran follor.

Roma mal labor fa l papa, quan tensona

ab l'emperador pel drech de la corona

ni l met en error ni ls seus guerriers perdona;

car aitals perdos

que non sec razos,

Roma, non es bos, anz, qui l ver en razona,

reman vergonhos.

Roma l glorios que sofri mortal pena

en la crotz per nos vos done mal' estrena;

car voletz totz jors portar la borsa plena, (jorns : díes; bossa)

Roma, de mal for,

que tot vostre cor

avetz en tresor: don cobeitatz vos mena

el fuoc que no mor.

Roma, del malcor que portatz en la gola

nais lo sucs don mor lo mons e s'estrangola

ab doussor del cor, de que l savis tremola

quan conois e ve

lo mortal vene (veneno)

que portatz el se, (Roma, del cor vos cola!)

don li pieitz son ple.

Roma, ben ancse ha hom auzit retraire

que l cap sem vo s te per que l faitz soven raire:

per que cug e cre qu'ops vos auria traire,

Roma, del cervel,

car de mal capel

etz vos e Cistel, qu'a Bezers fezetz faire, (Cistell, Císter)

mout estranh mazel.

Rom', ab fals sembel tendetz vostra tezura

e man mal morsel manjatz, qui que l'endura;

car' avetz d'anhel ab simpla gardadura

dedins lop rabat,

serpen coronat

de vibr' engenrat, per que l diable us cura

coma l sieu privat.

Peire Cardenal. Qui ve gran maleza faire + Tartarassa ni voutor ++

Peire Cardenal.

I.

Qui ve gran maleza faire

de mal dir no se deu taire;

per qu'eu volh dir e retraire

que rics hom dezeretaire

es pieger que autre laire

e fai diablia

peior que negus raubaire,

e plus tart si castia.

Rics hom, quan vai per carreira,

el a una companheira,

Malvestat, que vai primeira

e meiana e derreira;

e grans Cobeitatz enteira

li fai companhia;

e Tortz porta la senheira

et Orgolhs la guia.

Rics hom mals, quan vai en plassa,

que cuiatz vos que lai fassa?

Quant autr' om ri e solassa,

a l'un mou plag, l'autre cassa,

l'un maldi, l'autre menassa

e l'autr' afolia;

e no fai joi ni abrassa

si com far deuria.

Rics hom, quan fai sas calendas

e sas cortz e sas bevendas,

de toutas e de rozendas

fai sos dos e sas esmendas,

sos lums e sas offerendas,

e de raubaria;

et en guerras met sas rendas

et en plaidezia.

Rics hom mals, quan vol far festa,

auiatz consi fai sa questa:

tan bat la gent et entesta

tro que deniers non lor resta,

que no i cal venir tempesta

ni lam ni moria; (fam)

pois fai cara mout honesta,

qui no l conoissia.

Un pauc ai dig de la gesta

que dire volia;

mas tan grans massa'n i resta

que fort pauc embria.

II.

Tartarassa ni voutor

no sent plus leu carn puden

com clerc e prezicador

senton ont es lo manen:

mantenen son sei privat,

e quan malautia l bat,

fan li far donatio

tal que l paren no i an pro.

Frances e clerc an lauzor

de mal, car bon lor en pren;

e renovier e trachor

an tot lo segl' eissamen;

qu'ab mentir et ab barat

an si tot lo mon torbat

que no i a religio

que no sapcha sa leisso.

Saps qu'endeven la ricor

de cels que l'an malamen?

Venra un fort raubador

que non lor laissara ren,

so es la mortz que ls abat,

qu'ab quatr' aunas de filat

los tramet en tal maizo

ont atrobon de mal pro.

Hom, per que fas tal folor

que passes lo mandamen

de Deu quez es ton senhor

e t'a format de nien?

... ten el mercat

cel quez ab Deu si combat,

qu'el n'aura tal guizardo

cum ac Judas lo felo.

Deus verais, plens de doussor,

Senher, sias nos guiren,

gardatz d'enfernal dolor

peccadors, e de turmen;

e solvetz los del peccat 

en que son pres e liat,

e faitz lor verai perdo

ab vera confessio.

III.

Ar mi posc eu lauzar d'amor,

que no m tol manjar ni dormir,

ni n sent freidura ni calor,

ni no n badalh ni no n sospir

ni n vauc de noit a ratge,

ni n sui conques ni n sui cochatz,

ni n sui dolens ni n sui iratz,

ni non logui messatge

ni n sui trahitz ni enganatz,

que partitz m'en sui ab mos datz.

Autre plazer n'ai eu melhor,

que non trahisc ni fauc trahir,

ni n tem tracheiritz ni trachor,

ni brau gilos que m'en azir,

ni n fauc fol vassalatge,

ni n sui feritz ni derrocatz

ni no n sui pres ni n sui raubatz,

ni non fauc lonc badatge,

ni dic qu'eu sui d'amor forsatz,

ni dic que mos cors m'es emblatz,

Ni dic qu'eu mor per la gensor,

ni dic que l bela m fai languir,

ni non la prec ni non l'azor,

ni la deman ni la dezir,

ni no l fauc homenatge,

ni no l m'autrei ni l mi sui datz,

ni no sui seus endomenjatz,

ni a mon cor en guatge,

ni sui sos pres ni sos liatz,

ans dic qu'eu li sui escapatz.

Mais deu hom amar vensedor,

no fai vencut, qui l ver vol dir;

quar lo vencens porta la flor,

e l vencut vai hom sebelir;

e qui vens son coratge

de las desleials voluntatz,

don mou lo faitz desmezuratz

e li autre outratge,

d'aquel vencer es plus honratz

que si vencia cent ciutatz.

Pauc pretz prim prec de preiador; (5 p)

can cre qu'el cuia convertir, (4 c)

vir vas vil voler sa valor, (5 v)

don dreitz deu dar dan al partir; (5 d)

si sec son sen salvatge, (5 s)

leu l'es lo larcs laus lag lonhatz; (7 l)

plus pretz lauzables que lauzatz;

trop ten estreg ostatge (5 t)

dreitz drutz del dart d'amor nafratz: (5 d)

per plus pretz plus pretz es compratz. (6 p)

No volh voler volatge, (3 v)

que m volv e m vir vils voluntatz, (5 v)

mas lai on mos vols es volatz.

IV.

Una ciutatz fo, no sai cals,

on cazet una ploia tals

que tuit home de la ciutat,

que toquet, foron forsenat.

Tug dessenero, mas sol us;

aquel en escapet ses plus,

que era dins una maizo

e dormia, quant aisso fo.

Aquel levet, quant ac dormit

e fo se de ploure giquit,

e venc foras entre las gens.

E tug feiron dessenamens:

l'us a roquet, l'autre fo nus,

e l'autre escupi ves sus;

l'us trais peira, l'autre astella,

l'autre esquintet sa gonella,

l'us feri e l'autre enpeis,

e l'autre cuget esser reis

e tenc se ricamen pels flancs,

e l'autre sautet per los bancs;

l'us menasset, l'autre maldis,

l'autre ploret e l'autre ris,

l'autre parlet e non saup que,

l'autre fes metoas (?) de se.

Et aquel qu'avia son sen

meravilhet se mout fortmen,

e vi ben que dessenat son,

e garda aval et amon

si negun savi n'i veira,

e negun savi non i a.

Grans meravilhas ac de lor,

mas mout l'an ilh de lui maior,

que l vezon estar saviamen;

cuidon c'aia perdut son sen,

car so qu'ilh fan no lh vezon faire;

a cascun de lor es veiaire

que ilh son savi e senat,

mas lui tenon per dessenat.

Qui l fer en gauta, qui en col,

el non pot mudar no s degol;

l'us l'enpenh e l'autre lo bota,

el cuia eissir de la rota;

l'us l'esquinta, l'autre l'atrai,

el pren colps e leva e chai.

Cazen levan, a grans gambautz,

s'en fug a sa maizo de sautz,

fangos e batutz e meg mortz,

et ac gaug car lor fon estortz.

Cist faula es az aquest mon

semblans, et als homes que i son:

aquest segles es la ciutatz

quez es totz ples de forsenatz:

que l maier sens c'om pot aver

si es amar Deu e temer

e gardar sos comandamens:

mas ar es perdutz aquel sens.

La ploia sai es cazeguda,

cobeitatz, e si es venguda

us orgolhs et una maleza

que tota la gen a perpreza;

e si Deus n'a alcun gardat,

l'autre l tenon per dessenat

e menon lo de trop en bilh,

car non es del sen que son ilh,

que l sens de Deu lor par folia.

E l'amics de Deu, on que sia,

conois que dessenat son tut,

car lo sen de Deu an perdut;

et ilh an lui per dessenat,

car lo sen del mon a laissat.

Peire Vidal. Pos tornatz sui en Proensa + Baros Jezus + Drogoman

Peire Vidal.

I.

Pos tornatz sui en Proensa

et ab ma domna m sap bo,

ben dei far gaia chanso,

sivals per reconoissensa:

qu'ab servir et ab honrar

conquier hom de bon senhor

don e benfait et honor,

qui be l sap tener en car:

per qu'eu m'en dei esforsar.

Ses peccat pris penedensa

e ses tort fait quis perdo

e trais de nien gen do

et ai d'ira benvolensa 

e gaug entier de plorar

e d'amar doussa sabor,

e sui arditz per paor

e sai perden gazanhar

e, quan sui vencutz, sobrar.

E quar anc no fis falhensa,

sui en bona sospeisso

que l maltraitz me torn en pro,

pos lo bes tan gen comensa.

E poiran s'en conortar

en mi tuit l'autr' amador,

qu'ab sobresforsiu labor

trac de neu freida foc clar

et aigua doussa de mar.

Estiers non agra garensa,

mas quar vei que vencutz so:

sec ma domn' aital razo

que vol que vencutz la vensa;

qu'aissi deu apoderar

franc' umilitatz ricor,

e quar no trob valedor

qu'ab leis me posc' aiudar,

mas precs e merce clamar.

E pos en sa mantenensa

aissi del tot m'abando,

ja no m deu dire de no;

que ses tota retenensa

sui seus per vendr'e per dar.

E totz hom fai gran folor

que di qu'eu me vir alhor:

mais am ab leis mescabar

qu'ab autra joi conquistar.

E cel que long' atendensa

blasma, fai gran falhizo;

qu'er an Artus li Breto,

on avian lor plevensa:

et eu per lonc esperar

ai conquist ab gran doussor

lo bais que forsa d'amor

me fetz a mi dons emblar,

qu'eras lo m denh' autreiar.

Bels Rainiers, per ma crezensa,

no us sai par ni companho,

quar tuit li valen baro

valon sotz vostra valensa.

E pos Deus vos fetz ses par

e us det mi per servidor,

servirai vos de lauzor

e d'als, quant o poirai far,

bels Rainiers, car etz ses par.

II. 

Baros Jezus, qu'en crotz fo mes

per salvar crestiana gen,

nos mand'a totz comunalmen

qu'anem cobrar lo saint paes,

on venc per nostr' amor morir.

E si no l volem obezir,

lai on feniran tuit li plag,

n'auzirem maint esquiu retrag,

Que l saint paradis que ns promes,

on non a pena ni tormen,

vol ara liurar francamen

a cels qu'iran ab lo marques

outra la mar per Deu servir;

e cels que no l volran seguir,

no i aura negun, brun ni bag,

que no n posc' aver gran esglag.

Ar veiatz del segle quals es,

que qui l sec plus al peitz s'empren;

pero no i a mas un bon sen:

qu'om lais los mals e prenda ls bes.

Que pos la mortz vol assalhir,

negus no i pot ni sap gandir,

que pos tuit morrem atrazag,

ben es fols qui viu mal e lag.

Tot lo segle vei sobrepres

d'engan e de galiamen:

e son ja tan li mescrezen

qu'apenas renha dreitz ni fes,

que chascus ponha en trair

son amic per si enrequir:

pero lh trachor son aissi trag

cum cel qui beu toissec ab lag.

Catalan et Aragones

an senhor honrat e valen

e franc e larc e conoissen,

humil et ardit e cortes.

Mas trop laissa enmanentir

sos sers, cui Deus bais et azir,

qu'a totz jorns estan en agag

per far en cort dan et empag.

Reis aunitz val meins que pages,

quan viu a lei de recrezen

e plora ls bes qu'autre despen

e pert so que l pair' a conques.

Aitals reis fari' ad aucir

et en lag loc a sebelir,

qui s defen a lei de contrag

e no pren ni dona gamag.

Domnas velhas non am eu ges,

quan vivon descauzidamen

contr' amor e contra joven,

quar fin paratg' an si mal mes,

greu es de comtar e de dir

e greu d'escoutar e d'auzir;

quar fin domnei an aissi trag

qu'entre lor non trobon escag.

Domna, si m tenetz en defes

que d'al re non ai pensamen

mas de far vostre mandamen.

E s'en grat servir vos pogues

entre l despolhar e l vestir,

ja mais mals no m pogr' avenir,

quar vostre dig e vostre plag

m'an sabor de roza de mag.

Reis de Leon, senes mentir

devetz honrat pretz recolhir,

cum cel qui semen' en garag

temprat d'amor ab dous complag.

III. 

Drogoman, senher, s'eu agues bon destrier,

en fol plag foran intrat tuit mei guerrier,

qu'aissi mezeis quant hom lor me mentau,

mi temon plus que calhas esparvier, (gualla, guatlla : codorniu)

e no prezon lor vida un denier,

tan mi sabon fer e salvatg' e brau.

E s'eu agues caval adreg corsier,

suau s'estes lo reis part Balaguier

e dormis si planamen e suau:

qu'eu tengr' en patz Proens' e Monpeslier,

que raubador ni malvat rocinier

no rauberan mais Venaissi ni Crau.

Quant ai vestit mon blanc ausberc doblier

e cenh lo bran que m det en Gui l'autrier,

la terra crotla per aqui on eu vau,

e non ai enemic tan sobrancier

que tost no m lais las vias e l sendier,

tan mi dopton quan senton mon esclau.

D'ardimen valh Rotlan et Olivier

e de domnei Berart de Mondesdier,

car sui tan pros, per aco n'ai bon lau.

Mout mi venon sovendet messatgier

ab anel d'aur, ab cordo blanc e nier,

ab tals salutz, don totz mos cors s'esjau.

E si consec gelos ni lauzengier,

qu'ab fals conselh gaston l'autrui sobrier

e baisson joi a prezent et a frau,

per ver sabran qual son li colp qu'eu fier,

que, s'avian cors de fer o d'acier,

no lor valra una pluma de pau.

En totas res sembli bon cavalier

si m sui, e sai d'amor tot son mestier

e tot aisso qu'a drudari' abau:

qu'anc en cambra no vist tan plazentier

ni ab armas tan fer ni tan sobrier,

don tals mi tem qu'era no m ve ni m'au.

E si l reis torn' a Toloz' el gravier

e'n eis lo coms e sei caitiu dardier

que tot jorn cridon: “Aspa e Orsau!”

d'aitan mi van, qu'eu n aura l colp premier,

e farai tan que n'intraran doblier,

et eu ab lor, qui la porta no m clau.

Na Vierna, merce de Monpeslier,

en raina sai amaretz cavalier,

don jois m'es mais cregutz, per vos Deu lau.

Arnaut de Maroill. Bel m'es quan lo vens m'alena

Arnaut de Maroill.

Bel m'es quan lo vens m'alena

en abril, ans qu'intre mais,

e tota la noit serena

chanta l rossinhols e l jais.

Quecs auzels en son lenguatge,

per la frescor del mati,

van menan joi d'agradatge,

com quecs ab sa par s'aizi.

E pos tota res terrena

s'alegra, quan folha nais,

non posc mudar no m sovena

d'un' amor per qu'eu sui jais.

Per natur' e per uzatge

m'ave qu'eu vas joi m'acli

lai quan fai lo dous auratge,

que m reve lo cor aissi.

Plus blanca es que Elena,

belazors que flors que nais,

e de cortezia plena;

blancas dens ab motz verais,

ab cor franc ses vilanatge, 

color fresc' ab saura cri.

Deus, que l det lo senhoratge,

la sal, qu'anc gensor non vi.

Merce fara si no m mena

d'aissi enan per loncs plais,

e don m'en un bais d'estrena

e segon servizi mais;

e pois farem breu viatge

sovendet e breu cami,

que l seus bels cors d'alegratge

me a mes en est trahi.

II.

Domna, genser que no sai dir,

per que soven planh e sospir,

est vostr' amics bos e corals,

assatz podetz entendre cals,

mand' e tramet salutz a vos.

Mas a sos obs n'es sofraitos:

ja mai salutz ni autre be

non aura, si de vos no l ve.

Domna, loncs temps a qu'eu consir

co us disses o vos fezes dir

mon pensamen e mon coratje

per mi meteis o per messatje;

mas per messatge non aus ges,

tal paor ai c'ades no us pes;

ans o dissera eu meteis,

mas tan sui d'amor entrepreis,

can remir la vostra beutat,

tot m'oblit cant eu ai pensat.

Messatje us tramet mout fizel;

breu sagelat de mon sagel;

no sai messatje plus cortes

ni que melhs celes totas res.

Est conselh m'a donat amors,

a cui deman tot jorn socors;

amors m'a comandat escrire

so qu'ab la boca non aus dire.

Eu no us aus far esdig ni ganda

en so que amors me comanda.

Er auiatz, domna, si vos plai,

so que mos breus vos dira lai.

Corteza domn' e conoissen

e de bon grat a tota gen,

apreza de totz benestars

en fatz, en ditz et en pensars,

la cortezi' e la beutatz

e l genz parlars e l bels solatz,

l'ensenhamens e la valors,

e l gens cors e l fresca colors,

lo bels ris, l'esgarz amoros,

e l'autri benestar de vos,

e l bel fait e l dig agradiu

me fan la noit e l jorn pensiu.

Quan non ai loc de vos vezer,

joi ni deport non posc aver;

non posc aver joi ni deport,

peritz sui si non venc al port;

que l loncs espers e l loncs consirs 

e l trop velhars e l pauc dormirs

e l deziriers de vezer vos

me tenon si l cor angoissos.

Cen vetz prec Deu la noit e l jor

que m do mort o la vostr' amor.

Domna, si m do vostr' amor Deus,

cen tans sui vostre melhs que meus;

car de vos sai, domna, que m ve

tot cant eu fas ni dic de be.

E de vos ai l'ensenhamen 

e tot quan sai far d'avinen.

Lo premier jorn, domna, que us vi,

m'entret el cor vostr' amors si

qu'ins en un foc m'aves assis,

c'anc no mermet, pos fon empris:

focs d'amor es qu'art e destrenh

que vins ni aigua no l destenh.

Pos fon empris, anc non esteis,

de jorn en autre dobl' e creis.

E can me sui de vos lonhatz,

creis e dobla plus l'amistatz:

mas can se pot endevenir

qu'eu vos vei, domna, e us remir,

son aissi que mai res no m sen;

per que sai be qu'es falhimen

lo repropchiers c'om dire sol:

que olh no vezo, cors non dol. (ojos que no ven, corazón...)

Lo cors mi dol, domna, per ver,

can no us podon mei olh vezer.

Mas del vezer conselh non sai:

pero mos cors, que remas lai,

lo premier jorn que anc vos vi,

anc pois de vos no se parti;

no se parti de vos un torn,

ab vos sojorna noit e jorn,

ab vos estai on qu'eu esteia,

la noit e l jorn ab vos domneia.

Ges d'autr' afar pensar no m letz.

Enan m'esdeve mantas vetz,

can cuit entendre en autras res,

de vos ai messatje cortes:

mon cor, qu'es lai vostr' ostaliers,

me ven de vos sai messatgiers,

que m ditz e m remembr' e m retrai

vostre gen cors coindet e gai,

las vostras belas sauras cris,

e l vostre fron plus blanc que lis,

los vostres olhs vairs e rizens,

e l nas qu'es dreitz e be sezens,

la fassa fresca de colors,

blanca, vermelha plus que flors,

petita boca, belas dens,

plus claras qu'esmeratz argens,

menton e gola e peitrina

blanca com neus ni flors d'espina,

las vostras belas blancas mas,

als loncs detz granz, grailes e plas,

e la vostra bela faisso

on non a res de mespreizo,

los vostres gaps plazens e bos,

e l gen solatz e l franc respos,

e l bel semblan que m fetz al prim,

can s'esdevenc c'abdui nos vim.

Can so m remembra l cors ni m ditz,

adoncs remanc si esbaitz,

no sai on vauc ni on me venc;

meravilh me car me sostenc,

que l cors me falh e la colors:

si m destrenh, domna, vostr' amors.

Tot jorn sofre esta batalha,

mas la noit trac peior trabalha;

car can me sui anatz jazer,

e cuit alcun repaus aver,

e il companho dormo trestuit

que nuls non fai noisa ni bruit,

adonc me torn e m volv e m vir,

pens e repens, e pois sospir.

Soven me levi en sezens,

apres me retorn en jazens,

e colgui me sobre l bras destre,

e pois me vire el senestre,

descobre me soptozamen,

pois me recobre belamen.

E can me sui pro trebalhatz,

eu get defor abdos mos bratz

e tenc la cher' e ls olhs enclis,

mas jointas, deves lo pais,

on eu sai, domna, que vos es, 

la raizo fas c'auzir podes:

Ai, bona domna benestans,

si veira ja est fis amans,

a son viven, lo jorn ni l ser

que, a celat o per lezer,

vostre gen cors coind' e prezan

entre mos bras remir, baizan

olhs e boca tan doussamen

que sol un bais fassa m de cen,

et eu pel joi blasmar me lais! -

Er ai trop dig, mas no posc mais,

s'una vetz sola ai parlat

so qu'el cor ai mil vetz pensat.

Er ai trop dig, non posc plus dir;

mos olhs clauzens, fas un sospir,

en sospiran vau endormitz.

Adoncs s'en vai mos esperitz

tot dreitamen, domna, vas vos

de cui vezer es cobeitos.

Tot enaissi com eu dezir,

la noit e l jorn, can m'o consir,

a son talan ab vos domneia,

embrass' e baiza e maneia.

Ab que dures aissi mos soms,

no volri' esser reis ni coms.

Mai volria jauzens dormir

que velhan deziran languir.

E Rodocesta ni Biblis,

Blancaflors ni Semiramis,

Tibes ni Leida ni Elena

ni Antigona ni Esmena

ni l bel' Yseus ab lo pel bloi

non agro la meitat de joi

ni d'alegrier ab lor amis,

com eu ab vos, so m'es avis.

Per la doussor fas un sospir,

e pois trebalh al resperir,

obre mos olhs soptozamen,

gart sai e lai tot belamen,

trobar vos cuit, domna, latz mei,

mas no vos trop ni no vos vei. (trop : trob : trobo)

Clauzi mos olhs, torni ma chera,

las mas jointas d'aital manera

si ja m poiria endormir.

Mas jes no i posc endevenir:

ans torn en eissa la batalha

d'amor que m'auci e m trebalha.

Domna, no us posc lo cente dir

de las penas ni del martir,

del pantais ni de la dolor

qu'eu trac, domna, per vostr' amor.

Totz vius per vos art e aflam,

mas per merce us, domna, reclam

que m perdones, s'eu falh ni pec.

Auiatz et entendetz est prec,

domna, la genser criatura

que anc formes el mon natura,

melhor que non posc dir ni sai,

plus bela que bels jorns de mai,

solelhs de mars, ombra d'estiu,

roza de mai, ploia d'abriu,

flors de beutat, miralhs d'amor,

claus de fin pretz, escrins d'onor,

mas de do, capdels de joven,

cims e razitz d'ensenhamen,

cambra de joi, locs de domnei,

domna, mas jointas, vos soplei:

pois vostre soi si leialmens

vensa us merces e chausimens

que m retenguas a servidor,

e prometes me vostr' amor.

De plus no us prec ni no s cove,

mas tot si' en vostra merce,

qu'aissi m lais Deus d'amor jausir.

Mais am de vos sol un desir

o l'esperanza o long esper

que de null' autra son jazer.

E pos de me vos fas ligansa,

prometetz me bona esperansa.

De la promessa aurai cofort

e bon respit tro qu'a la mort;

mai volh e bon esper morir

no volh dezesperatz languir.

Domna, no us aus de plus preiar,

mas Deus vos sal e Deus vos gar!

Si us plai, rendetz me ma salut:

pos amors m'a per vos vencut,

vensa us per mi tot eissamens

amors que totas cauzas vens,

domna!