Aiso son las naturas d'alcus auzels e d'alcunas bestias.

Aiso son las naturas d'alcus auzels e d'alcunas bestias.

Del pol. 

La natura del pol es que canta lo vespre, can sent venir la nuech, pus soven; e l mati, can sen venir lo jorn, canta pus soven; e vas la mieia nueg engrueissa sa vot e canta pus larc e pus clar.

- De l'aze. 

La natura de l'aze es que canta, cant a fam et on mais se trebalha. 

- Del lop. 

La natura del lop es que, can ve hom' enans c'om lo veya, el li tol lo parlar. E si l'ome lo ve enans, l'ome li tol la forsa. Et a l col tan rot que no l pot plegar. E so que cassa va fort luenh de sa lobeyra; e cant vol intrar en cortal, va fort suau, e can mena segle ab sos pes, el pren son pe a mors fort e rege, et aysi s'en venja.

- Del grilh.

Lo grilh a tal natura que tant ama son cantar e tan s'en delecha que no s percassa de vianda e mor cantan.

- Del signe. 

Lo signes a tal natura que, can deu morir, canta tan clar que, si hom li ve denan ab esturmens, el si acordara ab los esturmens; adoncx conoys hom que deu morir.

- Del ca. 

Lo ca, cant a manjat et es sadol e ples, el geta so que a manjat; e cant a fam, o torn' a manjar.

- De la vibra. 

La vibra, can ve home nut, ela non l'auza regardar de paor; e cant lo ve vestit, no l preza re e sauta li desus. 

- Del simi. 

Lo simi vol centrafar (contrafar) tot cant ve far. E cant hom lo vol penre, hom se met en loc que lo veya, e caussa unas sabatas ab corregas e pueys laissa las sabatas e va s metre a una part. E l simi va e fay aital; 

e cant es caussatz, hom lo pren. 

- Del corp. 

Lo corp, cant a sos corbatos, que son ses pluma e no semblan paire ni 

mayre, ja non lur donara clam ni cosselh, tro que an pluma e que ls semblo. E cant troba home mort, premieiramen li manja los huelhs e per los huelhs lo servel.

- Del leon. 

Can lo leon a preza e home li passa denan, ja no l tocara, que passar y pot set vetz, sol que l'home no l regarde. Mas si l'ome lo garda, el es tan senhorilh que cui' esser deceubutz, car esgart d'ome es tan senhoril, e per so el laisa la cassa e cor vas hom e l cofon. E cant hom lo cassa que ve que no s pot defendre e l'aven a fugir, el cobri sas pezadas ab la coa dereire, per so c'om no veya son esclau. E can la leonessa a leonat, el nais mort; e tres jorns lo paire crida e rugis sobre el e fay lo vieure.

- De la mostela. Can la mostela a son mostelon qu'es natz, ela l muda per paor c'om no lo y emble; e si hom lo y men' a mort, ab c'om lo y rendes, ela l revieu. 

- Del calandri. 

Si l calandri porta hom denan un malaute et hom lo geta sul lieg, e lo calandri gara lo malaute en la cara, senhal es de guerir; e si l gira la coa, es senhal de mort.

- Serena canta tan dossamen que tot hom que l'auia, ven vas ley, e non pot estar que no s'adorma; e cant es adormit, ela l met mort. 

- De aspis. 

Aspis es la serp que garda lo basme; e cant hom vol aver del basme, hom lo adormis ab esturmens, e pren hom del basme; e can ve que es enganatz, el se clau la una aurelha ab la coa e freta tan l'autra per terra, tro que tota l'a clauza, per so que non auia los esturmens e velha.

- Del merle. 

Merles noiris hom volontiers; e non canta mas tres mes de l'an, e fa l pus plazen can que auzel que sia.

- De l'huelh de veire. Huelh de veire es un petitet auzel blanc e vert, et a la pus sotil vista que res que sia, que be veiria tras un paret.

- De la talpa.

Talpa no ve, ans a los huelhs desotz lo cuer, e sen pus fort d'autra bestia, e vieu de pura terra.

- Del pluvier. 

Pluvier vieu de pur aire del cel. 

- De la salamandra. 

Salamandra vieu de pur foc; e de son pel fa hom un drap que foc no l pot cremar. 

- De l'eranh. 

Eranh vieu de pur' aiga.

- De la trida. 

Can la trida a sos cadels, e ls cassadors la casson que l volon emblar sos tridos, els meton miralhs per aqui on els van e prendo sos tridos; e cant 

la trida a perdutz sos cadels, ela torna forssenada e sec per esclau los cassadors e troba los miralhs e mira se, et a tal gaug, can se ve, que tota sa dolor pert et aisi s'oblida de sos tridos. 

- De l'unicorn.

Hunicorn es la pus salvatja bestia que sia, que non es res que l'auzes 

esperar, ab un corn que a sul cap; et a ta gran plazer de flairor de pieuzela e de verginitat que, cant los cassadors lo volo penre, els li meton el pas una pieussela; e can la ve, el s'adorm e sa fauda, et adoncx es pres. 

- De la pantera. La pantera a tan dous ale e tan be flairan, que tot' autra bestia, pueys que l'a vista, no s vol d'ela partir, tro qu'es morta, per la flairor de l'ale.

- De las gruas. Gruas an tal natura que s'ajuston en grans tropels; e lur natura fa las trop dormir, e la una fay la garda, can las autras dormo; e per tal que la garda no s'adorma, ela met a sos pes de petitas peiretas, per tal que non puesca estar ferma, car lur natura es que dormon en pes.

- Del paon. 

Paon, tota la garda que a, es en regardar sa coa.

- De l'argus. 

Argus es homs que a cen huelhs, e dorm de dos en dos huelhs, et enaisi velha tostemps. 

- De la randola. 

Randola, qui trazia los huelhs a sos randolos e ls y tornava, la maire los 

fay revezer; e no manja ni pais mas en volans, e non a paor d'auzel de cassa.

- Del pellica.

Pellicans es us auzel que ama mot sos poletz; e cant sos pols lo senton venir, els baton lurs alas e donon ne al pellican per los huelhs; e l  pellican es tan ergulhos e de tal natura que totz los aussi; e cant ve que son mortz, el a gran dol e leva l'ala et ab lo bec obri son costat et arroza ls de son sanc, e tornon vieus. 

- Del castor.

Lo castors es una bestia que a un membre que porta medecina, e per aco lo cassa hom; e can ve c'om lo cassa, a gran paor de mort e sap que per lo membr' es cassatz, c'aital es sa natura; et el lo pren ab las dens et arraba lo s e laissa l cazer el sol, e ls cassadors venon aprop e, can vezon lo membre, prenon lo e laisso l anar; enpero d'an en an remet lo membre. 

- Del pic. 

Pic a aital natura que fai son nis en albre cavat, e cant hom li tapa son nis ab que que sia, el va per una erba e toca lo n, e tantost es hubert.

- De l'erisso. 

Erisso a tal natura que se met en las grans bartas et en las grans rodas d'espinas que no l puesca hom penre, que per totas partz ponh; e garda que sia en loc pres de pomier, que dins de la barta puesca manjar. 

- De la cocodrilla. 

Cocodrilha es una bestia mala; e can ve hom, ela l devora tot, e cant lo a manjat, ela lo plora totz los temps que vieu. Et estalva se que una serp, que a nom idre, ven vas la cocodrilla e fa se adormitz; e can la cocodrilla ve que l'idres dorm, ela l devora en un morcel; e can lo idre ve qu'es el ventre de la cocodrilla, el li trauca los costatz e va fora gauzens, e la cocodrilla mor.

- De l'idre. 

Idre es una serp que, cant hom li talha una testa, el ne met doas; e d'aquel idre s'a paor la cocodrilla. 

- De la vibra.

Can la vibra vol aver paria de sa par, el met son cap en la boca bayan de 

la femela; e la femela estrenh li tan fort lo bec e l cap al mascle que 

mantenen mor; e la femela reman prenhs de doas vibras, mascle e feme; e can devon naysser, els salhon per l'esquina, e la maire mor; et enaisi el mon non son mas dos. 

- De la simia.

La simia fay dos simos; e cant hom la cassa, ela met sel que mens ama sul col, e tenga se, si s vol; e sel que mays ama, lo maior, met entre sos bras, e fug ab dos pes. E cant ve que non li val re, per tal que puesca mielhs fugir ab catre pes, ela laissa sel que mays ama, e fug s'en ab lo menor.

Raimon d'Avinho. Sirvens sui avutz et arlotz,

Raimon d'Avinho.

Sirvens sui avutz et arlotz, 

e comtarai totz mos mestiers:

e sui estatz arbalestiers

e portacarn e gualiotz

e rofians e baratiers

e pescaires et escudiers,

e sai ben de peira murar,

pero de cozir non trop par,

e mauta portei mantas ves,

et ai mais de cent auzels pres;

e sui trobaires bels e bos,

qu'eu fas sirventes e tensos,

e sui joglars desavinens

e de set ordes sui crezens.

E fui mazeliers e fis datz,

e corregiers fui lonjamens,

e sai far anels bels e gens

e rateiras per penre ratz,

e far ausbercs e garnizos,

e sai far putas e lairos,

e sancnei bras, e fui boviers

e mais d'un mes mercadaniers,

e sai far arcas e vaissels,

penches e fus e cascavels,

e sai far galeas e naus,

coutels et espazas e faus;

e sai esser pestres e cocs,

e sui bos meges, quant es locs.

E fui clergues e cavaliers

et escrivas e taverniers,

e sai far selas et escutz,

e sai ben penher e far glutz,

e sai teisser e far carbo,

e sai faire de gal capo,

e sai far teules e capels,

e sai far gipas e gipels,

e sai far lansas e bordos,

e sui espessials trop bos,

e sai batre lan e deniers,

e sui fort cortes aguilliers,

e sui cambiaires leials,

e sui enves las femnas fals.

E fis estueiras e tamis,

e serquei aur e pueis m'assis

a cavar argen ben tres ans,

e fui corrieus arditz e grans,

e sai far fres et esperos,

e budelliers fui a sazos,

e fis caus e fui campaniers,

e sai ben esser falconiers,

e fui portiers e barufautz

e gacha per fregz e per cautz,

e billaires e berretiers,

e fui de seda bos obriers,

et engienhs fis, si Dieus mi gar,

e cordas e pairols sai far.

Ancar n'ai agutz de melhors,

qu'eu gardei fedas et anhels,

e fui crestaires de porcels,

e teis fil de maintas colors,

e toquei azes e saumiers,

e fui mai de dos ans porquiers,

e fui penchenaire de li,

e guardei mais d'un an moli,

e fui manescals de cavals

e guardei eguas per las vals,

e fui fabres e pelleciers,

si m'aiut Dieus, e sabatiers;

qui m'en vol creire, bos fols sui,

e savis be, quan trop ab cui.

E fis olas e fui sauniers,

e fui cassaires e veiriers,

e fis pargamins e fossatz,

e sai liar radels erratz.

E taillei borsas e vendei

plom per argen, e pois menei

orps e devinc redons e gras,

e fui barbiers, e paniers fas.

VI. Fragmens extraits du dictionnaire manuscrit du patois de Grenoble.

N° VI.

Fragmens extraits du dictionnaire manuscrit du patois de Grenoble.

1.

Rapport du Jeu connu en Dauphiné sous le nom de Allen-Jean, avec celui que les Grecs appelaient *gr (1 : Ce jeu était chez les Grecs celui de Pair ou Impair. (Meursius, de Ludis Graecorum).

L'un des deux joueurs met dans sa main un certain nombre de noisettes, et s'adressant à celui qui joue avec lui, il dit: Allen-Jean.

- L'adversaire répond: Je ministro, comme pour dire qu'il accepte le jeu. - Le premier demande jusqu'à quand, et le dernier répond jusqu'à dix ou tout autre nombre. S'il se rapporte avec le nombre des noisettes renfermées dans la main, il les gagne, sinon il donne à l'autre un nombre de noisettes égal à ce qu'il y en a en plus ou en moins de celui qu'il a indiqué.

Ce jeu ressemble beaucoup à celui des Grecs; il n'y a pas de doute qu'il ne soit aussi ancien qu'eux dans la Gaule. On remarque dans les mots qui servent à ce jeu des finales rimées, comme on les observe toujours dans les proverbes et adages de tous les idiomes vulgaires.

2. Les Chalendes.

On donne ce nom au jour de Noël; il est dérivé du mot latin Kalendae.

On commençait autrefois l'année par ce jour, qui est le 25 décembre, comme aussi par la fête de l'Annonciation, la même que celle de l'Incarnation qu'on célèbre le 25 mars. De là la différence que l'on trouve dans les vieux actes latins dont les uns portent: Anno ab Incarnatione Domini, et d'autres anno a Nativitate, ce qui donna lieu à beaucoup de méprises, jusqu'à ce que Charles IX, par son ordonnance de 1564, eût fixé le commencement de l'année au jour de la Circoncision, 1er janvier.

Du mot Chalendes on a fait Chalendal, nom que l'on donne à une grosse bûche que l'on met au feu la veille de Noël au soir, et qui y reste allumée jusqu'à ce qu'elle soit consumée. Dès qu'elle est placée dans le foyer, on répand dessus un verre de vin en faisant le signe de la croix, et c'est ce qu'on appelle batisa lo chalendal. Dès ce moment cette bûche est pour ainsi dire sacrée, et l'on ne peut pas s'asseoir dessus sans risquer d'en être puni au moins par la gale.

3.

Le Cochemar.

Cette indisposition est connue vulgairement sous le nom de chauchi vieilli, parce que ceux qui en sont attaqués croient qu'elle est causée par de vieilles sorcières qui descendent la nuit par la cheminée, et qui vont se coucher sur les malades et les tourmenter.

4.

Sur les Crétins.

On donne ce nom dans les Alpes aux personnes frappées d'imbécillité, accompagnée ordinairement de goîtres et autres vices de conformation. Ces individus offrent exactement l'image de la stupidité personnifiée et de l'absence de toutes les facultés intellectuelles. On sent facilement quel serait le sort de ces malheureux, qui se rencontrent ordinairement dans des familles pauvres, s'ils étaient à la merci de l'égoïsme de leurs parens, qui n'attendent les moyens d'exister que de leur propre travail. Mais une salutaire et bienfaisante opinion fait regarder ces infortunés comme un bienfait de la Providence envers leur famille; c'est un envoyé de Dieu chargé de lui faire connaître ses vœux et ses besoins. A ce titre il n'y a point de soins, point d'égards dont les Crétins ne soient le sujet, et leurs besoins physiques sont ordinairement satisfaits avec un empressement qui serait bien digne d'éloge s'il était désintéressé.

On emploie aussi le mot crétin dans le sens de désolé, infortuné, etc. 

Il se trouve dans une chanson bachique, dont voici deux couplets.

1.

Je seu ton creitin

Lo cour me pendole, 

Je m'en voï à Crole (1)

Per bêre de vin;

Car noutrous autin

N'ont ren que de foille,

Personna ne troille

Fauta de raisin.

(1 : Village près de Grenoble dans la vallée de Graisivaudan, et dont le vin a quelque réputation.)

2.

Meichenta jalla!

Freidura perversa!

Maudita traversa

Qu'a tout deisola!

Qu'eito que faron

Notres yvrognasse; 

Lou pot et le tasse 

Se reposaron.

III. Parabole de l'Enfant prodigue en langue vaudoise, Vaudois, manuscrit

N° III.

Parabole de l'Enfant prodigue en langue vaudoise, extraite d'un Nouveau-Testament de la Secte des Vaudois, manuscrit du treizième siècle, de la Bibliothèque de Grenoble.

Un home aë diù filh, e lo plus jove dis al Païre: O Païre, dona a mi la partia de la substancia que se coven ami; e departie à lo la substancia.

E enaprès non motidia, lo filh plus jove, ajostas totas cosas, ane en peleriniage en lognana region, e degaste aqui la soa substancia, vivent luxuriosament. E poisqu'el ac consuma totas cosas, grant fam fo fait en aquella region, e el commence have besogna, e ane ese ajoste à un ciptadin daquella region, e travie l'en la soa vila quel paisses li porc; e cubitava umplir lo seo ventre de las silicas que manjavan lè porc, e alcun n'in donava ale. Mes retorna en si dis: quanti mercenar habundian de pan en la meison del meo païre, me yo patisso aici de fam; yo me levarey e annarey al mio païre e diréy a le: o païre, yo pechey al cel e devant tu, e ja non sey degne esse apella lo teo filh, fay mi essay à un de li teo mercenar.

E levant, venc al seo païre. Mes come el fos encara de long, lo seo païre vec lui e fo mogu de misericordia, e corrent, cagic sobe lo col de le e bayse le. E lo filh dis a le: o païre, yo pechey al cel e devant tu, yo non soy degne esse apella lo teo filh. Mes lo païre dis al seo serf: fo raporta viact. la premiera vestimenta e vestic le, e done anel en la man de le, e ceauçamentas en li pe, e ameni vedel gras e l'occien, e manjen e alegran, car aqueste meo filh era mort e es reviscola, e era perdu e es atroba; e commenceron alegrar.

Mes lo filh de le plus velh era al canp, e cum el vengues e sappies a la meison, auvie la calamella e la compagnia, e apelle un de li serf e demande qual fossan aquestas cosas, e el dis a le: lo teo fraire venc, e lo teo païre occis vedel gras, car el receop lui salf. Mes el fo endegna e non

volia intrar. Me lo païre de le issi, commenca pregar li; mes es rendent dis al seo païre: vete yo syuo a tu per tanti an e unque non trapassey lo teo comandament, e unque non donnes a mi cabri che yo manjes cum li meo amic; mes poisque aquest teo filh loqual devore la soa substancia cum las meretres e vengu, tu occies a le vedel gras. Mes el dis a lui: 

o filh! tu sies tota via cum mi, e totas las mias cosas son toas; mes la conventava manjar e alegrar, car aquest teo fraïre era mort e es reviscola, e era perdu e es atroba.

19. Amerigo di Peguilhan. Sicum l'albres que per sobrecargar

19. Amerigo di Peguilhan. *

La prima di queste poesie, che chiude la serie delle citate nel De Vulgari Eloquentia é data secondo la lezione di B pubblicata dal Diez (Altromanische Sprachdenkmale, Bonn, Weber, 1846, p. 95) e dal Mahn (Gedichte der Troubadours, n. 344). 

Per la seconda, con la quale si entra nella serie delle poesie relative a cose d'Italia o composte da Italiani, si segue la lezione di D (in Cavedoni, Ricerche storiche intorno ai Trovatori provenzali accolti ed onorati nella corte dei marchesi d'Este nel secolo XIII, Modena, Soliani, 1844, p. 5); 

per la terza e la quarta la lezione pubblicata dal Mahn (Werke der Troubadours, II, 165 e 172); 

per la quinta e la sesta la lezione pubblicata dal Raynouard (Choix, IV, 61; Lexique Roman, I, 433). (Ed. Ramón Guimerá Lorente, Moncho de Beseit.)

Sicum l'albres que per sobrecargar

fraing si mezeis e pert son fruig e se,

ai eu perdut ma bella dompna e me, 

e mos engeins se fraing per sobramar. 

pero sitot me sui apoderatz,

anc jorn non fi mon dan ad escien, 

anceis cuich far tot so que fatz ab sen; 

mas er conosc que trop sobra il foudatz. 

E non es bon c'om sia trop senatz

que a sazos non sega son talen; 

e si noi a de chascun mesclamen, 

non es bona sola l'una meitatz. 

ben esdeven hom per sobresaber

nescis e'n vai maintas vetz follejan; 

per que s'eschai qu'om an en luoc mesclan 

sen ab foldat, quils sap gen retener.

Las, qu'ieu non ai mi mezeis en poder,

anz vau mon dan enqueren e cercan, 

e vuoill trop mais perdre e far mon dan 

ab vos, dompna, c'ab autra conquerer, 

c'ancse cuig far en aquest dan mon pro

e que savis en aquesta follor. 

pero a lei de fol fin amador

m'avetz ades, on pieitz mi faitz, plus bo.

Non sai nuill hoc, per qu'ieu des vostre no;

pero soven tornon mei ris en plor, 

et eu cum fols ai joi de ma dolor

e de ma mort, quand vei vostra faisso. 

col basalencs c'ab joi s'anet aucir, 

quand el miraill se remiret eis vi: 

tot atressi etz vos miraills a mi, 

que m'aucietz, quan vos vei nius remir. (ni us)

E nous en cal, quan mi vezetz morir, (no us)

abanz o faitz de mi tot atressi 

cum de l'enfan c'ab un maraboti 

fai hom del plor sebrar e departir; 

e puois quand es tornatz en alegrier 

et hom l'estrai so queil donet eil tol, (que il; e il)

et el adoncs plora e fai major dol 

dos aitans plus que no fetz de primier.

Tiriaca, jes vostre pretz non col

de meillurar, c'uoi valetz mais que hier. (uoi : lat. hodie : huy : avui)

Za non cuidei quem pogues oblidar 

lo danz c'ai pres d'amics e de segnors; 

mais lo granz danz oblid om pel majors, 

c'aizo es danz que nos pot emendar, 

quel meillor cors del mond el mels apres 

lays m'o; que tuz sabez ben del marques 

d'Est, cals era, no vos cal laudar ges; 

morz es; mas eu no cre q'e negun temps

morisson tan de bon costum esemps.

Qu'el fo savis e conoiscenz, e sap far 

a mesura, tan qu'era sa valors

el plus aut grad pozad e sos prez sors; 

e sostenir que nos pogues baisar 

la saup ab sen; pois fo larcs e cortes, 

humils als bos et als mals d'orgoils ples, 

e bos d'armas, adreichs en totas res, 

e vertadiers a son poder tuz temps, 

quel cor el sen i mes el fait esemps. 

Autre dol hai que m'es greus a durar 

del gai compte Verones, qu'era flors

de grant beutat e de tuz beus colors. 

quil seu bos aips vos volia contar, 

nols poria toz retrair' en un mes; 

ne non es hom que tener se pogues, 

sels audia, que de cor non plangues, 

per zo car mai no falliran null temps

aquest dui dol que son vengut esemps. 

Segner marques, vos fasiaz donar

a tals cui ja dar no fora sabors; 

pois fasiaz al menuz donadors 

creiser lor dons, cant audian parlar

del vostre fait cum era sobremes.

qui fara mai los bels dons nils granz bes? 

ni de cal cort venra tan ric arnes 

cum fazia de la vostra tuz temps, 

car negus tan cum vos non dava esemps? 

Segner marques, que faran li zuglar, 

a cui fezes tanz dons, tantas honors? 

mas un conseill no sai als trobadors: 

laissos morir et anous lais cercar; 

car sai no vei guaire qui de lor pes, 

car vos noi ets nel valenz coms noi es.

pauc nos laisset Deus ves que trop n'a pres,

si laisset tan, qu'el durera toz temps

planz e sospirs e dolors tot esemps. 

Aquel ver Deus que fo et er toz temps, 

los meta amdos en paradis esemps.

Selh que s'irais ni guerrey' ab amor, 

ges que savis no fai al mieu semblan; 

quar de guerra ven tart pro e tost dan, 

e guerra fai mal tornar en pejor;

en guerra trop, per qu'ieu non la volria, 

viutat de mal e de ben carestia;

e fin' amors, sitot mi fai languir,

a tant de joy quem pot leu esjauzir.

Quel plazer so plus que l'enuey d'amor, 

el be quel mal el sojorn que l'afan, 

el gaug quel dol el leu fays quel pezan,

el pro quel dan son plus el ris quel plor.

non dic aissi del tot que mal noi sia,

el mal qu' om n' a val mais que si 'n gueria, 

quar selh qu'ama de cor non vol guerir, 

del mal d'amor, tant es dous per sufrir. 

Enquera truep mais de ben en amor, 

quel vil fai pros el nesci gen parlan, 

e l'escars larc e leyal lo truan, 

el folh savi el pec conoissedor,

e l'orgulhos domesg' e humilia,

e de dos cors fai un, tan gen los lia; 

per qu'om non deu ad amor contradir,

pus tan gen sap comensar e fenir.

S'ieu l'ai servit, pro n' ai cambi d'amor, 

ab que ja plus nom fassa mais aitan;

qu' en mainh locs m'a fag tan aut e tan gen, 

don ja ses lieys no pogr' aver honor, 

e moutas vetz mi gart de vilania, 

que ses amor gardar no m'en sabria; 

e manhs bos motz mi fai pessar e dir, 

que ses amor noi sabria venir.

Bona dona, de vos tenc e d'amor 

sen e saber, cors e cor, motz e chan; 

e s'ieu res fatz que sia benestan, 

devetz n' aver lo grat e la lauzor 

vos e amors, quem datz la mayestria; 

e si ja plus de ben no m'en venia, 

pro n' ai cambi, segon lo mieu albir; 

e si plus fos, be saubral plus grazir. 

Chansos, vai t'en de ma part e d'amor 

al pro al ric al valen al prezan,

a cui servon Tyes et Alaman,

e sopleyo cum bon emperador; 

sobrels majors a una majoria: 

honor e pretz, larguez' e cortezia; 

larcs es de cor, d'amar e de servir, 

valens de fag per ric pretz conquerir.

Bona domna, la genser etz que sia, 

vas vos azor e soplei nueg e dia; 

jamais de vos no me volrai partir, 

qu' en tot lo mon non pogra miels chauzir.

Mantas vetz sui enqueritz

en cort cossi vers no fatz, 

per qu'ieu vuelh si' apelatz 

e sia lurs lo chauzitz: 

chansos o vers aquest chans.

e respon als demandans,

qu' om non troba ni sap devezio,

mas sol lo nom, entre vers e chanso.

Qu'ieu ai motz mascles auzitz

en chansonetas assatz,

e motz femenis pauzatz

en verses bos e grazitz;

e cortz sonetz e cochans

ai ieu auzit en verses mans,

e chansos ai auzidas ab lonc so,

els motz d' amdos d' un gran el chan d'un to.

E s'ieu en sui desmentitz,

qu' aisso no sia vertatz;

no er hom per me blasmatz, 

si per dreg m'o contraditz; 

ans n'er sos sabers plus grans 

entrels bos el mieus mermans, 

si d'aissom pot venser segon razo; 

qu' ieu non ai ges tot lo sen Salamo. 

Quar es de son loc partitz 

domneys, que ja fon prezatz, 

mi sui alques desviatz

d'amor, tan m' estauc marritz! 

qu' entr' amairitz et amans

s'es mes us pales enjans,

qu' enjanan cre l' us l' autre far son pro,

e noi guardon temps ni per que ni quo. 

Qu'ieu vi, ans que fo faiditz,

si fos per amor donatz

us cordos, qu' adreg solatz

n' issia e ricx covitz;

per quem par que dur dos tans

us mes no fazia us ans,

quan renhava domneys ses tracio;

greu es qui ve com es e sap com fo. 

E non es tan relenquitz,

sitot mi sui dezamatz, 

qu' ieu no sia enamoratz

de tal qu' es sima e razitz

de pretz, tan qu'a me es dans;

pus la valors el semblans

son assemblat en tan bella faisso, 

qu' om noi pot neys pessar meliurazo. 

Ai, belh cors cars, gen noiritz,

adregz e ben faissonatz,

so qu' ieus vuelh dir devinatz;

qu' ieu no sui ges tan arditz

qu' eus prec que m'ametz, abans

vos clam merce merceyans.

sufretz qu' ieus am e nous quier autre do, 

e ges d'aquest nom devetz dir de no. 

Vas Malespina vai, chans,

al pro Guillem qu' es prezans, 

qu'elh aprenda de te los motz el so, 

qual ques vuelha per vers o per chanso. 

Na Beatriz d'Est, l' enans

de vos mi platz ques fai grans;

en vos lauzar s' en son pres tug li bo, 

per qu' ieu de vos dauri mon vers chanso.

Era par ben que valors se desfai,

e podetz o conoisser e saber, 

quar selh que plus volia mantener 

solatz, domney, largueza ab cor verai, 

mezura e sen, conoissensa e paria,

humilitat, orguelh ses vilania,

els bons mestiers totz ses menhs e ses mai,

es mortz, Guillems Malespina marques,

que fo miralhs e mayestre dels bes.

De bons mestiers el mon par non li sai,

qu'anc non fon tan larcs, segon mon parer, 

Alixandres de manjar ni d'aver,

qu'elh non dis non quil quis, ni trobet plai;

ni ges d'armas Galvains plus non valia, 

ni non saup tan Yvan de cortezia, 

nis mes Tristans d'amor en tan d'assai; 

hueymais non er chastiatz ni repres 

negus, si falh, pus lo miralhs noy es.

On son eras siei dig plazent e guai 

e siei fag plus poderos de poder

quels autres fagz fazian desvaler? 

oi dieus! cum son escurzit li clar rai 

qu'alumavan Toscana e Lombardia, 

per que quascus anava et venia

ab lo sieu nom, ses dopte e ses esmai! 

qu'aissi saup pretz guizar, tan fon cortes, 

cum l'estela guidet los reys totz tres.

Per cui venran soudadier de luenh sai

nil ric joglar quel venian vezer? 

qu'elh sabia honrar e car tener 

plus que princeps de sai mar ni de lai, 

e manhta gens ses art, ses joglaria, 

per lo sieu don on negus non falhia; 

que manh caval ferran e brun et bai

donava plus soven et autr' arnes

de nulh baron qu'ieu anc vis ni saubes. 

Belhs senher cars, valens, e que farai? 

ni cum puesc sai vius ses vos remaner? 

quem sabiatz tan dir e far plazer 

qu'autre plazers contral vostrem desplai; 

que tals per vos m'onrava e m'aculhia 

que m'er' estrans, cum si vist no m'avia: 

ni ja nulh temps cambi non trobarai 

ni esmenda del dan qu'ai per vos pres, 

ni eu non cre qu'om far la m'en pogues. 

Lo senher qu'es una persona en tres, 

vos valha aissi cum ops ni cochaus es.

Li folh el put el filhol 

creisson trop, e no m'es belh;

el croy joglaret novelh, 

enveyos e mal parlan, 

corron un pauc trop enan, 

e son ja li mordedor

per un de nos, duy de lor, 

e non es qui los n'esquerna. 

Greu es quar hom lor acol, 

e non lor en fai revelh; 

non o dic contra 'n Sordelh, 

qu'el non es d'aital semblan, 

ni nos va ges percassan 

si col cavalier doctor; 

mas quan falhol prestador, 

non pot far V ni VI terna. 

Lo marques part Pinairol, 

que ten Saluz e Revelh, 

no vuelh ges que desclavelh 

de sa cort ni an lunhan 

Persaval, que sap d'enfan

esser mayestre tutor;

ni un autre tuador,

qu'ieu no vuelh dir, de Luzerna.

Aitals los a com los vol

lo marques d'Encantarelh, 

Nicolet, el trufarelh

que venon ab lui e van, 

e non del tot per lor dan, 

bes son trobat d'una color; 

a tals vassals tal senhor; 

dieus lor don vita eterna!

Ar veiretz venir l'estol 

ves Malespina el tropelh, 

donan la carn e la pelh; 

et ades on piegz lor fan 

e menhs de merce lor an; 

trop son li combatedor

e pauc li defendedor;

mortz son si dieus nols governa.

Estampidas e rumor

sai qu'en faran entre lor 

menassan en la taverna.

* Biografia, secondo il testo edito dallo Chabaneau (op. cit. p. 75): 

N'Aimerics de Peguilha si fon de Tolosa, fils d'un borges qu'era mercadiers que tenia draps a vendre. et apres cansos e sirventes, mas molt mal cantava. et enamoret se d'una borgeza sa vezina, & aquela amors li mostret trobar, e si fetz de leis mantas bonas cansos. mas lo maritz se mesclet ab lui e fetz li desonor; e'n Aimericx s'en venget, qu'el lo ferit d'una espaza per la testa, per quel covenc a issir de Tolosa e faidir. et anet s'en en Cataluenha, e 'n Guillems de Berguedan si l'aculhit; & el enanset lui e son trobar, en la primeira chanso qu'el avia faita, tan qu'el li donet son palafre e son vestir: e presentet lo al rei n' Anfos de Castella, quel crec d'aver e d'armas e d'onor. et estet en aquelas encontradas lonc temps; pueis s'en venc en Lombardia, on tug li bon home li feiron gran honor: e lai definet en eretgia, segon c'om ditz.